Namminersornerusut WWF-mik oqaloqateqarusunngillat
Nunarsuarmi pinngortitaq pillugu suliniaqatigiiffissuup (WWF) nannut pillugit immikut ittumik ataatsimeersuarnermut atatillugu nannut atugaat pillugit namminersornerusuneersut ataatsimeeqatiginiarsimagaluarpai. Namminersornerullutik oqartussaneersut soqutiginnissimanngillat.
Ataatsimeersuarneq Norgemi Tromsømi sapaatip akunnerani uani siusinnerusukkut pivoq.
Kalaallit Nunaata Canaddallu piumasaqarnerisigut matut matuneqarput, avatangiisinut pinngortitamullu suliniaqatigiiffiit assigiinngitsut ataatsimeersuarnermi politikkikkut oqallinnernut malinnaasinnaajunnaarsillugit. Tamanna tunngavigalugu WWF-ip namminersornerullutik oqartussaneersunik ataatsimeeqatigiinnissaq suliniutigisimagaluarpaat, silaannaap kissatsikkiartornerisa nannut inuuniarnerannut sunniutaat pineqartillugit ernumanertik nassuiaatiginiarlugu.
- Kisianni namminersornerusuneersut aallartitaasa pisortaata Amalie Jessenip soqutiginninnani ilisimatitsissutigaa. Tamanna soorunami uggornarpoq, tassami tassunga tunngatillugu nunanik allanik angusaqaataasumik suleqateqarpugut, sorlu Rusland aamma Norge, WWF-imi siunnersorti Stefan Norris sermitsiaq.gl-imut nassuiaavoq.
WWF naapertorlugu nunat issittup nanoqarfiusut Norgep, Kalaallit Nunaat/Danmarkip, Canadap, ruslandip aamma USA-p ataatsimeersuarnermi inaarutaasumik oqaaseqaammi nunarsuup kissatsikkiartornera issittup nanuanut annertuumik navianartorsiiutaanera eqeersimaarfigalugu ilisimaaraat. Ataatsimeersuarnermilu peqataasut nunat naalakkersuisui tassunga atatillugu kajumissaarpaat, kissatsikiartorneq akiorniarlugu CO2-mik aniatitsinerup millisarneqarnissaa sulissutigeqqullugu.
- Inernera ernummatigisatsinnit pitsaaneruvoq, illuatungaatigulli aamma isumaqatigiissummik piumasaqaatitaqarnerusumik neriuuteqarsimagaluarpugut. Kisianni peqataasut naalakkersuisuminnut tassunga tunngatillugu pisussaaffiliisinnaannginnerat eqqumaffigaarput, Stefan Norris oqarpoq.
Pineqartumut tunngatillugu Amalie Jessen oqaaseqartinniarsimagaluarlugu ajornarsimavoq.