Namminersortunngorsaanissaq suli naamik
Kuupik Kleist mianersoqqusivoq: – Namminersortunngorsaagutta suliffeqarfiit annikinerusumik pisortaniit sunniuteqarfigineqarsinnaalissapput.
Naak Inatsisartuni partiit tallimaasut suliffeqarfiit pisortanit pigineqartut siunissaat pillugu nalinginnaasumik oqallinnissaq ilassilluaraluaraat, taamaattoq aalisakkanik suliffeqarfissuup Royal Greenland A/S-ip namminersortunngorsarnissaa pigaluttualinngilaq.
Ukiuni arlaqalersuni milliuunilikkaanik amigartoortarneq milliardinillu akiitsoqarnikkut aningaasatigut tunngavissat mangiarneqarsimapput, siornalu nunatta karsianit milliardip affaanik annaassinarluni aningaasaliisoqartariaqarsimalluni. Royal Greenland sukaterinarluni neriorsuivoq suliffeqarfik namminersortunngorsarneqarluni tunineqaruni naleqarneruniassammat. Suliffeqarfiulu tunineqarnissaa tunineqannginnissaluunniit pillugu aalajangiisoqartinnagu Naalakkersuisut suliffeqarfik sulinissaanut eqqissisimatippaat.
Siumumiit Ruth Heilmann marlunngormat ualikkut Royal Greenland A/S-p tamakkiisumik ilaannakuusumilluunniit namminersortunngorsarnissaa pillugu oqallinnermik aallarniivoq: Suliffeqarfiit Namminersorlutik Oqartussanit pigineqartut nunatsinni inuutissarsiorermi ullumikkut aalajangiisuuallaaqaat.
Ruth Heilmannili piginnittunut namminersorlunut anenrtuunik arlalinnik piumasaqarpoq. - Suliffeqarfiup innuttaasunut pisussaaffeqarnera annikillissanngilaq, nunatsinnilu kulturitsinnut ataqqinninneq annikillinani.
Taama oqarneratigut Naalakkersuisut siulittaasuat Kuupik Kleist, Inuit Ataqatigiit, mianersoqqusivoq: – Namminersorlutik Oqartussat suliffeqarfik namminersortunut tunigunikkut naalekkersuinikkut sunniisinnaaneq annikinnerulissaaq.
Kattusseqatigiit Partiianniit Jakob Skadep apeqquserpaa, nunatsinni namminersortut Royal Greenlandip kilisaataataannik avataasiortunik suliffissuarnillu tigusinissaminnut akissaqassanersut, taamaattorli piviusoorsiornertut isigaa suliffissuit maannakkut matoqqasut namminersortunit nunaqavissunit tiguneqarnissaat.
Inatsisartut ukiakkut ataatsimiilerunik suliffeqarfiit pisortanit pigineqartut siunissaat pillugu nalinginnaasumik oqallisissapput, Naalakkersuisulli Royal Greenland pillugu ammasumik Inatsartuni oqaluuserineqarnissaa kissaatiginngilaat, nunarsuarmi niuernerup iluani sakkortuumik unammillertoqarnera tunngavigalugu.