Namminersulivinnissaq peqqissaartumik ingerlattariaqarpoq
Doris Jakobsenip namminersulivinnissaq pillugu nalunaarutigaa tamanna aningaasanut tunngassuteqanngitsoq Kattusseqatigiit Partiianit akerlerineqartoq
Doris Jakobsen nunatsinni politikikkut suliniuteqaqataareerami imatut paasineqassanerluni ullumikkut nunatsinni pissutsitigut killiffitsinni namminiilivinnissamut periareersimanersugut ilisimalersimagaa? Kattusseqatigiit Partiianiit isumaqarpugut taamaattoqanngitsoq, Angutinnguaq Heilmann aamma Karl Frederiksen tusagassiivinnut allapput.
Taakkua maluginiaqquaat, namminersulivissagutta namminersulivitsinnata minnerpaamik tunngaviusumik inatsitaaqqaartariaqartugut aammalu peqqissaartumik piareersaaneq ingerlanneqaqqaartariaqartoq taassumalu ilutigisaanik inatsisit pioreersut ullutsinnut nalimmassarlugit nutarterneqaqqaartariaqartut.
- Minnerunngitsumik nunatta aningaasatigut nammineerluni imminut napatilernissaa eqqarsaatigalugu, anguneqaqqaartariaqartut Kattusseqatigiit Partiianiit isumaqarpugut. Inatsisiliassat nutartigassallu inaarlugit suliaritinnagit nunarput nammineq naalagaaffittut aallartissappat, naalagaaffiussaaq sumilluunniit piareersaateqarsimanngitsoq. Taamaattumik politikkikkut akisussaaffinnik tamakkiisunik nunatsinnut nussuinermi piareersarluniarnissaq saneqqunneqarsinnaanngilaq.
Kattusseqatigiit Partiianiit aamma isumaqarpugut nunarput nammineerluni naalagaaffittut aallartissappat arriitsumik mianersortumillu assigiinngitsorpassuarnik iluarsartuusseqqaartariaqartugut aammalu politikikkut naammattoortarumaagassatsinnut sillimmartaareertariaqartugut minnerunngitsumillu inuiaqatigiit sumiiffinni assigiinngitsuniittut atugarisaat eqqarsaatigilluakkamik aaqqiivigisinnaanngorlugit politikikkut inissisimaleqqaartariaqartugut.
- Tamatuma saniatigut Doris Jakobsen ilisimatikkusupparput nunatsinni innuttaasut Kalaallit Nunaat namminersulivissanersoq namminneq aalajangissammassuk Folketingimut ilaasortap tamanna aalajangigassarinngilaa, Angutinnguaq Heilmann aamma Karl Frederiksen nassuiaapput.