Nannunik nalunaaqutsersuineq nangippoq
Ilisimatuut Pinngortitaleriffimmeersut Niaqornaniit Savissivimmut nannunik nalunaaqutsersueqqissapput. Tamanna pissaaq 19. marsimiit 20. apriilimut.
Nannut Kalaallit Nunaata Canadallu akornanni sikuni ingerlaartarnerat, qanorlu siammarsimatiginerat aamma nunarsuup kiatsikkiartornerata kinguneranik sikuerukkiartorneranit qanoq sunnerneqarnera paasiniarneqassammat.
Pinngortitaleriffik taama tusagassiuutinut nalunaaruteqarpoq.
Misissuinerit 2011-mi Baffin Bugtimi nannunik kisitsinissamut pilersaarutaasumut allarnisaataassapputtaaq.
Ilisimatuut nannut 20-t ilisimajunnaarsillugit qaammataasatigoortumik aallakaatitsissutilernissaat pilersaarutigaat. Arnavissat arfineq-pingasut qaqortumik qungasequtserneqassapput sinnerilu siutimikkut mikisunnguamik aallakaatitsissuserneqassallutik.
Aallakaatitsissutit nannut qanoq angalaarnerat nalunaarsussavaat.
Suliaq kalaallit pisortaat sinnerlugit Pinngortitaleriffimmit ingerlanneqassaaq, qallunaallu Miljøstyrelseannit akilerneqassalluni.
Aallakaatitsissutit uumasut ukiup ingerlanerani qanoq angalaarnerat oqaluttuarisinnaavaat, ikkunneqarnissaallu akisuukasiulluni. Nannup ataatsip aallakaatitsissuserlugulu paasissutissanik tunniussugaanik misissuiffiginera 200.000 kronit miss. akeqarpoq.
Taamaattumik nannut aallakaatitsissutitallit pisarineqartannginnissaat Pinngortitaleriffiup ilungersortumik inassutigaa.