Nanoq alla islandimut pivoq
Københavns Zoo Islandimukaqqusaavoq, tassani nanoq uumasut inaannut pulatinniaraluassallugu, taamatut allappoq Ekstrabladet.
Ilisimaneqanngilaq nanoq qanoq isilluni Islandimut pisimanersoq - sapaatip akunneri marluk qaangiutiinnartut nannup nunatsinneersup tammarluni Islandimut pineranit aallaaneqarneranillu.
– Tamaani tusagassiorfiit malillugit arnaq qimmini ujaaralugit nanoq takusimavaa. Siullermik isumaqarsimagaluarpoq tassaasoq pooq qaqortoq naggorissaatinik imalik, qimmiili qiluttuaannarsimapput. Naggataatigut paasaivaa "pooq" uumasoq politiillu attaveqarfigalugit, Ekstrabladet allappoq.
Sapaatip akunnerisa marluk matuma siornatigit islandimiut tusagassiorfitsigut saassunneqarput, nanoq tammarluni Islandimut pisoq toqummassuk. Maanna nanoq uumatillugu pisariniarniarpaat Københavns Zoo-lu qaaqqusimallugu. Nanoq nerisassai aqqutigalugit ilisimajunnaartinniarneqassaaq.