Nanoq Nuup tungaanut ingerlaarpoq
Mads Bek qatanngutaalu illup iluani assiaqutsersortariaqarput Nuup eqqaani Qooqquniitillutik nannumik qaninngoorneqaramik
- Mads Bekip silamut quiartortilluni qimmerujussuaq takusoraa, tassanngaannarli paasivaa nanuusoq, Erik Palo Jacobsen Qooqquniinnerminik oqaluttuarpoq qatanngutigiit sakkussaannik VHF-radiomillu pajullugit.
Mads Bek qatanngutaalu Qooqquniipput neriniartarfimmik ammaanissartik piareersarlugu, kisianni sakkoqaratillu VHF-radioqanngillat. Ilaannikkut oqarasuaat angallattagaq attaveqarsinnaasarpoq, taamaalillunilu Erik Palo Jacobsen pisut pillugit Mads Bekimik sms-imik pissarsivoq.
- Arctic Boat Charterimik Kim Godtfredsen inuusuttullu arlaqartut peqatigalugit Itinneranut ingerlaarpunga, nalunaarfigineqarpungalu, taamaattumillu Qooqqunukarpugut. Umiarsuaq alapernaarsuut Knud Rasmussen qanittumiippoq aqumiut aalisarniarmata. Nalusimavaat qanittumi nanoqartoq.
Nanoq aallaaneqartariaqarpoq
- Aqumiut isumaqatigiissuteqarfigaakka ikiuinissaminnut piareersimassasut nannumik ujaasininni. Nanoq maannakkut Nuup tungaanut naluppoq uangalu saninnguani ingerlaarlunga, Erik Palo Jacobsen sisamanngornermi ullaap tungaani aqqarnup qeqqata missaani oqaluttuarpoq.
Nannumik pisaqarnissaminut akuersissuteqanngilaq GKLK-miilli qulakkeerneqarpoq piniartoq nannunnissaminut allagartaqartoq pisaqartuussasoq, maannakkorpiarmi sumiiffimmi tassani nannumik pisaqartoqarsinnaavoq.
Mads Bek qatanngutaalu ullaakkut Issittumi uumasut qaasuttut annersaannik naapitsinerminni tupassimaqaat. Erik Palo Jacobsenip oqaatigaa qatanngutigiit ajunngitsut maannakkullu qoorortooqarlutillu VHF-radioqartut.
- Oqaluttuaraat nanoq illup eqqaani narajorsimasoq matulu kumigarlugu, Qooqqunilu illunut allanut ingerlaqqissimasoq, Erik Palo Jacobsen oqaluttuarpoq.