Nanortalimmi aqquserngit asfaltimik nutaamik qallerneqartussanngorput
Nanortalimmi innuttaasut aqquserngup asfaltimik nutaamik qallerneqarnissaat qilanaarisinnaavaat. Narsami aqquserngit aappaagu aamma suliarineqassapput.
Qaqortumi aqquserngit asfaltimik nutaamik siorna qallerneqarput. Nanortalimmi aqquserngit maanna suliarineqartussanngorput.
Nanortalimmi aqquserngit asfaltimik qallersorneqarnissaanut piareersaatit maanna aallartereersimasut, Kommune Kujalleq nittartakkamini ilisimatitsivoq.
Aqquserngit asfaltimik qallersorneqarneri aasap ingerlanerani naammassissasut, kommuni ilisimatitsivoq.
Aqquserngit asfaltilersorneqarnerani asfalti 500 tons atorneqassaaq.
- Nanortalimmi asfaltiterinissamut piareersarneq aallartereerpoq, pilersaarutillu malillugit junip naalernerani aqqusinermi qallersuineq aallartissaaq, Teknikkimut avatangiisinullu ingerlatsivimmi ingerlatsinermut pisortaq Pâlo O. Kuitse oqarpoq.
Narsami aappaagu suliaqartoqassaaq
Narsami innuttaasut suli utaqqilaassasut, Kommune Kujalleq ilisimatitsivoq.
Nukissiorfiit Narsami erngup aqqutaanik pilersitsinissamik nutarterinissamillu suliaqartussaapput, aqquserngillu taamaattumik assanneqartariaqassallutik.
- Nukissiorfiit ukiuni tullliuttuni tallimani Nanortalimmi erngup aqqutaanik pilersitsinissamik nutarterinissamillu pilersaaruteqarput, matumanilu aqquserngit assaaffigineqartussaanngitsut ukioq manna asfaltiterneqassapput, Pâlo O. Kuitse oqarpoq.
Narsami aqquserngit nutaamik asfaltilersorneqarnissaat pilersaarutaavoq.