Nukissiorneq
Nanortallip eqqaani nukissiorfeqalernissamut periarfissanik ingerlatsineq paatsiveqanngitsoq
Pisortat taama eqeersimaartigisumik namminersortut ineriartornissamut periarfissaannik akornusiisarmata namminersortut pitsaanngitsumik inissisimapput, inuussutissarsiutinik ingerlatsisoq Svend Hardenberg, suliffeqarfiutini Nanoq Power Nanortallip eqqaani misissueqqaarnissamik suliniummut itigartitaareersorlu, oqarpoq
Inuussutissarsiornermut, Suliffeqarnermut, Niuernermut Nukissiuuteqarnermullu Naalakkersuisoqarfik Nanortallip eqqaani erngup nukinganik nukissiorfiliornissamut suliniummik namminersortut ineriartortitsiniarnerannik akornusiisimavoq.
Nanoq Power uukapaatinneqartutut misigisimavoq, naalakkersuisoqarfiup maanna tamatumunnga taarsiullugu pisortanit aningaasaliissutit suliniummut, Nukissiorfinnit ineriartorteqqissallugu kissaatigineqanngitsumut, misissueqqaarnernik ingerlataqaqqinnissamut atornialermagit.
Taama nukissiuuteqarnermik suliffeqarfimmik namminersortumik Nanoq Powerimik pilersitsisut ilaata Svend Hardenberg isornartorsiuinera nipeqarpoq, tamatumanilu nalunaarusiat Namminersorlutik Oqartussanit 2015-imi suliarineqarsimasoq innersuussutigalugu, tassani allassimasoqarmat, Nanortallip eqqaani suliniut erngup nukinganik nukissiorfiliornissamut periarfissatut piviusorsiortutut isigineqanngitsoq, »taamaattumillu misissueqqaarnerit unitsinneqallarneqartut «.
– Nalunaarusiaq taanna saqqummiunneqarmalli allanngortutuaasimasoq tassaavoq Nanoq Powerip pilersinneqarsimanera Nanortalimmi suliniut nalilersoqqikkumallugu immaqalu piviusorsiortuusutut isumaqarfigigutsigu ineriartortillugu. Kisianni suliffeqarfimmut ingerlaavartumik isumalluarnartunik nalunaartoqartaraluartoq naalakkersuisoqarfimmit suliffeqarfiup namminersortup nalilersuinermik taama ittumik suliaqarnissamut akuerineqanngissaa sulissutigineqarsimavoq, Svend Hardenberg oqarpoq.
Allaaserisaq tamaat Sermitsiami uani sapaatip-akunnerani saqqummertumi atuaruk. Aviisi uani pisiariuk: