Napaattuup siunnersuutaa taperserneqartoq: Kangerluit ilaanni angalaneq killilersorneqassaaq
Naalakkersuisup misissuineq qaangiinnarlugu umiarsuit takornariartaatit umiarsuillu allat kangerlunni aalajangersimasuni angalasinnaanerat killilersulerniarpaa.
Naleqqameersup Jens Napaattuup umiarsuit soorlu takornariartaatit angallatillu allat kangerlunni ”qilalukkat qaqortat qernertallu sivisunerusumik najortagaanni nipinut illersorniarlugit” killilersorneqarsinnaanerat misissortikkusuppaa.
Partiip Naleqqap Tunumi kangerluk Kangerlussuaq aamma Qaanaap eqqaani kangerluk aalajangersimasumik eqqarsaatigineqartut, Jens Napaattooq siunnersuummini upernaakkut ataatsimiinnermi oqaluuserisassanngortinneqartumi allappoq, kisianni aamma kangerluit allat ilanngunneqarsinnaasut.
Umiarsuit nipiliornerisa qilalukkanut qernertanut qaqortanullu qimaatitsinissaat Naleqqap ernumassutigaa.
- Naleraq isumaqarpoq uumasut, najugaqartut neqissaqarniarnerannut pingaarutillit illersorneqarnissaat siuarsarniarlugu pisariaqartunik iliuuseqarnissaq pingaaruteqartoq, siunnersuuteqartoq allappoq.
Nalunaarummik atulersitsiniartut
Avatangiisinut naalakkersuisup, Kalistat Lundip (IA), siunnersuut tigulluaraa akissuteqaammi Inatsisartut nittartagaanni saqqummiunneqartumi takuneqarsinnaavoq.
Misissuinissamut taarsiullugu naalakkersuisoq allannguutissatut siunnersuuteqarpoq. Allannguutissatut siunnersuummi misissuinissaq qaangiinnarneqassaaq, Naalakkersuisullu nalunaarummik suliaqarsinnaalersissallugit, ”nipiliornernut arferit illersorneqarnissaat siunertaralugu, kangerlunni arferit aasaanerani sivisunerusumik najortagaanni angallatinik aalajangersimasumik suussusilinnik imaatigut angalanermut maleruagassiiviusumik suliaqarnissamik Naalakkersuisut peqquneqassasut.”
Namminersorlutik Oqartussat allaffissornikkut isumalluutaat killeqarnerannik, Naalakkersuisut iliuuseqarnermut tunngavilersuuteqarput:
- Taamaattumik isumalluutit pigisatta aalajangersimasunik iliuuseqarnernut atornissaat kissaatigaarput–annertunerusumik misissuinissanut taarsiullugu nutaanik inatsisiliornermut. Kisianni maleruagassiineq soorunami atuisut biologillu qanimut suleqatigalugit ineriartortinneqassaaq, Kalistat Lund allappoq.
Naalakkersuisoq: Piniartut umiarsuarnik akornusersuisunik misigisaqartarput
Pingaartumik umiarsuit takornariartaatit uumasunut piniakkanut akornusersuisinnaanerannik, Naleqqap ernumassuteqarnera Naalakkersuisut tunngaviusumik isumaqatigaat:
- Piniartut Ittoqqortoormiineersut, Tasiilameersut Qaanaameersullu oqaluttuarput, pingaartumik umiarsuarnit takornariartaatinit aammalu tissiartaatinit mikisunit akornusersuineritnalaattarlugit. Piniartut oqarnerat malillugu umiarsuit kangerlunni ilorpartertarput ilaannikkullu imaani uumasut miluumasut imaluunniit piniartut piniariartut qanillisarpaat.
- Tamanna uumasunut aammalu piniartutut kultureqarnitsinnut akornusersuineruvoq. Peqatigisaanillu arferit akornusersuinernut nipiliornernullu malussarissorujussuusut, biologit misissuinerisa takutippaat, naalakkersuisoq allappoq.
Naleraq ilaatigut qilalukkat qernertanut pisassiissutit ikiliartornerannut arlaleriarlutik akerliusarput. Tunumi qilalukkat qernertat piniarneq pissutigalugu nungutaaratarsinnaanermut ulorianartorsiornerat, biologit misissuinerisa takutippaat. Naleqqap tamanna qularnartoqartippaa, partiip oqarnera naapertorlugu najugaqartut sumiiffimmi qilalukkanik qernertarpassuarnik takusarmata.