Nappaatit suussusersineqarnikuusut angajoqqaarsianut piumasaqaateqarnerulersitsipput
Meeqqat angerlarsimaffiup avataanut inissinneqartartut amerliartuinnartut nappaateqartarput, tamannalu ilaqutarsianut piumasaqaatinik annertusisitsisarpoq pissarsiniarnerlu ajornakusoornerulersillugu. Illoqarfiit pingaarnersaanni kommunimi ingerlatsivik taama oqarpoq, meeqqallu angerlarsimaffiup avataanut inissinneqarsimasut amerlassusaat allanngujuitsuusut taakkua nalunaarutigisinnaavaat.
Kommuunit meeqqanik angerlarsimaffiup avataanut angajoqqaarsianut inissiiuartariaqarput, meeqqallu angerlarsimaffiup avataanut inissinneqartussat amerliartuinnartut nappaammik ataatsimik arlalinnilluunniit nappaateqarnerat pissutigalugu suliassaq tamanna ajornakusoornerulersimavoq.
Taama Kommuneqarfik Sermersuumi Meeqqanut Ilaqutariinnullu Ingerlatsivimmit kommunimi politikerinut nalunaarusiami naliliisoqarpoq.
Ingerlatsivik naapertorlugu 2023-mi ilaqutariit paarsisartut ikilerialaarsimapput. Ingerlatsivimmit pissutaasutut ilimagineqartut ilagaat ilaqutariit paarsisartut akissarsiaat ilaqutariit paarsisartut suliassaannut sanilliullugit naapertuutinngitsutut misigineqartarneri. Tamatuma saniatigut meeqqat inuusuttullu angerlarsimaffiup avataanut inissinneqartartut ataatsimik arlalinnilluunniit nappaatilittut/innarluutilittut suussusersineqarnikuusut piumasaqaateqarnerulersitsipput:
- Meerarsianik nappaateqartutut/innarluuteqartutut suussuserneqarnikuusunik tiguserusussinnaasunik angajoqqaarsiassarsiortarneq ajornakusoortuuvoq, Ingerlatsivik allappoq.
Meeqqat angerlarsimaffiup avataanut inissinneqarsimasut amerlassusaat allanngunngillat
Kommunimi meerarsiaasut amerlassusaat 2023-mi allannguuteqarpallaarsimanngitsut, Ingerlatsivik nalunaarpoq.
Kommunemi katillugit 100-t missaanniittut angajoqqaarsiaapput, taakkualu akornanni meeqqat 160-it inissinneqarsimapput.
Meeqqat sumi inissinneqarnersut takussutissiami ataaniittumi takuneqarsinnaavoq. Nuummi ilaqutariinnut paarsisartunut nalinginnaasunut inissiinerit Nuummi 66-iusut, Tasiilami 78-iupput.
Kommunimi aamma ilaqutariinnik inuussutissarsiutigalugu marlunnik/pingasunik paarsisartoqarpoq, taakkununngalu meeqqat arfinillit inissinneqarsimapput.
Meeqqat ilaqutariinnut paarsisartunut inissinneqarsimasut saniatigut meeqqat 210-t missaat ulloq unnuarlu paaqqinnittarfinniipput. Aamma tassani inissitat 2023-p ingerlanerani allanngorsimanngillat, Ingerlatsivik nalunaarpoq.
Nalunaaruteqartoqartarnera annikilliartorpoq
Nalunaarutigineqartut ikileriarsimasut Ingerlatsivik nalunaaruteqarpoq:
- 2022-mi meeqqat pillugit ernumassuteqarluni nalunaarutiginninnerit 3196-it tiguneqarsimapput. Ukioq 2023-mi meeqqat pillugit ernumassuteqarluni nalunaarutiginninnernut tunngatillugu kisitsisit taakku 3041-nut appariaateqarsimapput.
- Sooq kisitsisit taakku appariaateqarsimanerat qularnaatsumik nassuiarneqarsinnaanngilaq, taamaattorli meeqqat inuusuttullu pillugit ernumassutaasimasut ikinnerusimanissaat ilimagineqarpoq. Nikingassuteqarujussuanngillalli, taamaammallu kisitsisit allanngoranngitsutut nalilerneqarput.