Napparsimasumik ikiuunniarluni patermik nassaartoqarsinnaagunartoq
Kalaallimit qallunaamillu kingoqqisumit patermik, kræftimik napparsimasup Nini Tessingip Qaqortumeersup katsorsaatigisinnaasaanik nassaartoqarsinnaagunarpoq
Københavnimi Rigshospitalimi nakorsat maanna patermik ujaasipput kræftimik napparsimasup Nini Tessingip Qaqortumeersup katsorsaatigisinnaasassaanik.
Kisianni pateq ujarneqartoq qallunaamit aamma kalaallimit kingoqqisumeersuusariaqartoq nakorsanit ujarneqarpoq, taamaattumik nassaarinissaa ajornartorsiutitaqarluni.
- Isertugaqarnanga oqaatigisariaqarpara, sakkortooq: - Kalaallimit qallunaamillu kingoqqisumit patermik atorsinnaasumik nassaarsinnaanissamut neriuut annikitsunnguuvoq, Rigshospitalimi Hæmatologisk Klinik-imi pisortaq nakorsaaneq Lars Kjeldsen Sermitsiaq.AG.-mut oqarpoq.
Nakorsaneq oqaluttuarpoq nunarsuarmi paterminnik tunniussisinnaasutut allattugaatigisani 15 millioniusuni amerlanerpaarpaat qaamasumik ameqartut.
- Kisianni inuit paterminnik tunniusserusullutik nalunaartut aaviisarfimmut qaninnerpaamut saaffiginnissinnaapput ilisimatitsissutigalugu patermik tunniussisuujumallutik, Lars Kjeldsen oqarpoq.
Napparsimasoq tunniusserusuttorlu imminnut assingusariaqarput
- Erseqqissaatigisariaqarporli inummut aalajangersimasumut tunniussisartutut nalunaartoqarsinnaanngimmat. Aak aamma timip ipiutaasartaat misissorneqartariaqarput napparsimasup tunniussisullu timaasa ipiutaasartaat assigiittariaqarmata. Qallunaamik kalaallimillu kingoqqisut akornanni tunniussisinnaasutut naleqqunnerpaat akornanniilluni ilisimasariaqarpoq, klinikkimi nakorsanut allanut pisortaq oqarpoq, taakkua aakkut nappaatini immikkut pikkorissartuarput soorlu aakkut kræfteqarnermi, leukæmimi 22-nik ukiullip Nini Tessingip nappaatigisaatut ittunik.
- Patermik tunniussisinnaasoq eqqortoq nassaariuminaappoq, Lars Kjeldsen oqarpoq.
Rigshospitalimi Blodbank (aaversittarfik) ilisimatitsivoq aaversittartut paternik tunniussisinnaasut. Aaversittartunngorniaraannilu aaviisarfik qaninneq saaffigineqartariaqarpoq imaluunniit nakorsarisaq saaffigineqassalluni. Qaammatit marluk ingerlasinnaapput Aaviisarfimmit saaffiginnittoqarnissaata tungaanut.
Aaversittartut aaversinnermik atasumik paternik tunniussisinnaasutut nalunaaruteqarsinnaapput.
Kalaallit Nunaanni Peqqinnissaqarfik ataasinngornermi akissutigisinnaanngilaa Kalaallit Nunaanni paternik tunniussisartutut allatsittoqarsinnaanersoq.