Napparsimasut angerlarsimaffiat: Kalaallit ilaqutariiaat
Københavnimi napparsimasut angerlarsimaffiani kikkut tamarmik decembarimi ulapputtarput pinnersaaqataallutik juullernissaanullu pikillutik. – Arlalitsigut juullimut ileqqutoqaapput, ilaqutariit amerlaneruinnarlutik, pisortaq Bitha Bianco oqarpoq.
Kikkut tamarmik Kalaallit Nunaanni ilaquttatik peqatigalugit juullisiornissaminnut perirfissaqanngillat. Københavnimi napparsimasut angerlarsimaffiani maannakkut najugaqartut 85-iupput ilaqutaat ilanngullugit. Amerlanersaat juullikkunni napparsimasut angerlarsimaffianiissasut ilimagineqarpoq.
Juulli napparsimasorpassuarnut ajornakusoorsinnaavoq – ingammik peruluttunut, taamaattumik pingaartuuvoq kikkut tamarmik peqataasutut misigitinnissaat. Napparsimasummi angerlarsimaffiat ”angerlarsimaffiuvoq” napparsimaviunani imaluunnit akunnittarfik.
- Tamatigut najugaqartut ilaqutaallu sapinngisatsinnik akuutinniartarpavut. Akunnittarfiunanilu peqqissaaviunngilaq, amerlaqisunulli angerlarsimaffiugallartoq, taamaattumik imminut ikiornissamut tapersersuisaqaagut kikkullu tamarmik nukissaqartut akuutinniartarlutigit, ukiuni kingullerni sisamani pisortaasoq Birtha Bianco oqarpoq.
Napparsimasut angerlarsimaffiani napparsimasut affangajaat kræftimut katsorsartittuupput, ilarpassui sivisuumik sakkortuumillu katsorsartissimallutik. Taamaattumik juulli ulluinnarni ulapaarfiusumi ilungersunarsinnaasumilu unitsiarnerusarpoq iluarineqartoq.
Juullip ulloriai 50-init amerlanerusut
Juullimut nuannisarneq novembarip 30-aniilli aallartittarpoq, Københavnip avannaani Hareskovenimi napparsimasut sulisullu orpiit avalequtaannik, inerititaannik orsuaasanillu juullimut pinnersaatissanik aallerlutik, decembarip aallaqqaataani pinnersaasiassaminnik.
- Tamatuma saniatigut kajumissusiminnik sulisut adventip sapaataanni tamani napparsimasunik qiortaaqateqartarput. Taava aamma juullimut tuniniaanernut assigiinngitsunut angalaartitsisarpugut, soorlu Kalaallit Illuutaani juullimut tuniniaanermut, juullimi tusarnaartitsinernut, takusassiamullu ”Julehilsen til Grønland” bilitserpassuarnik pisisarluta. Taava napparsimasut julebankortitsisarput, nalinginnaasumillu inuit juullimut nuannisartitsinissamut isumassarsiullaqqittarput. Illumi ataatsimoornermik misigisoqartarpoq qanigisaasullu namminneq aamma suliniuteqarlutillu akisussaffimmik tigusigajuttarput, tamannalu nuannertaqaaq, Birtha Bianco oqarpoq.
Juullimut ullorissat 50-init amerlanerusut igalaani qaammaqqutaasarput, illorsuullu saani kusanarluinnartumik orpeqatarpoq. allaat arlaleriarluni apisimasarluni.
Juulllimut nerisassat
Juullip ulluinut tamanut nerisarfik nalliuttumut tulluartunik nerisassaateqartarpoq. Juulliaqqami nerisassat suli inissivinngillat, siornali juulliaqqami brunchertoqarpoq, kalaallit nerisassaataannik ulloqeqqasiortoqarluni unnukkullu qeerlutooq, puuluki siataq, rødkål naatsiiallu sassaalliutigineqarlutik soorunamilu tunissutissartalimmik risalamandeqarluni, orpiliarluni tussiaqatigiilluni tunissutissanillu aqquaasoqannginnerani. Juullerujussuarmi nunatsinneersumik savaaraqartarpoq namminerlu æblekagiliaqarluni.
- Juullimut nerisassat suli inissivinngilavut, amerlanerilli inniminnereerpavut, sapinngisarpullu tamaat kalaalerpaluttuutinniarlugillu juullimut nerisassaatinniassavavut, Birtha Bianco oqarpoq.
Napparsimasut ilaqutaallu napparsimasunut angerlarsimaffimmi najugaqartut saniatigut sulisut aamma napparsimasut peqqissaavinniillu imaluunniit katsorsartinnermik akunnisigut angerlarsimasut takuniartarpaat.
Kop og Kandemit tunissutit
Siornatuut Kop og Kande napparsimasut angerlarsimaffianut juullimut tunissuteqarsimavoq, kikkut tamarmik juullimut tunissutisillutik.
- Tamanna qujamasuutigeqaarput. Qiimanermik pilersitseqataavoq, kikkut tamarmik orpiup ataanit tunissutisillutik ammagassaminnik, Birtha Bianco oqaluttuarpoq.
Juulliaqqami unnukkut nalinginnaasumik sulisut pingasuupput, peqqissaasoq, isumaginninnermik suliaqartoq igaffimmiorlu. Kikkulli tamarmik ikiuuttarput, ilaqutariittut misinnartarluni, nerrivimmik pinnersaasoqarluni, nerisassiortoqarluni, nerersuaqatigiillunilu, naggataagut tussiarlunilu orpiliartoqannginnerani.
- Siorna avannaamiut aappariit napparsimasut angerlarsimaffianiipput, juullip kingorna oqartut aatsaat taamak nuannertigisumik juulliararsiorsimallutik. Tamanna killitsinnaqaaq, aammami nuannisartoqarpoq, inuit katsorsartinnerat tuaviuunneqartorsuunngimmat imaluunniit Danmarkimi aaqqissuusaanermik malinnaaniarsaraluni, tamanna ilaanni kipiluttunarsinnaallunilu paatsuunganarsinnaassarmat. Juullimi eqqissisimasoqartarpoq, tamannalu amerlaqisut nuannarisarpaat.
