Narsami 24-nik ukiulik ipilluni ajunaarpoq
Ualikkut fiistialaarneq alianartumik kinguneqarpoq 24-nik ukiulik Narsap imeqarfiani ipilluni ajunaarmat.
Inuusuttut arfinillit Narsami kiassiorlutik nuannisaleruttornerat alianartumik kinguneqarpoq, angut inuusuttoq 24-nik ukiulik Narsap imeqarfiani Narsamiit 300 meterinik ungasissusilimmi ipimmat.
- Inuusuttut imeqarfimmi nalunnguartut fiistialaarput imersimallutik nallorissuunatillu. Isiginnittup oqaluttuarnera naapertorlugu 24-nik ukiulik nalussinnaanngivippoq tatsillu naqqa tummarsinnaajunnaaramiuk paatsiveerulluni. Ilaasa annaassiniarlutik nunaliaassiniarnerat sivitsortoorpoq annaassiniartut aamma nallorippallaannginnerat pissutigalugu, Narsami politeeqarfiup pisortaa Mathæus Larsen oqaluttuarpoq.
Inuusuttut 24-nik ukiulik ikiueqqaarnermik tuniniaraluarpaat, ikiueqqaarnermilli ilinniarsimannginnertik pissutigalugu pisinnaasaat aamma killeqarsimallutik.
Politiit ambulancelu takkummata 24-inik ukiulik toqoreersimavoq.