Narsami borgmesteriusimasoq toqusoq

Torben Emil Lynge, ”Nukartara”, sivisuumik napparsimareerluni arfininngorneq 22. aprilip unnuaani 83-inik ukioqarluni toquvoq.

Torben Emil Lynge Atassut sinnerlugu Inatsisartunit ilaasortaasimavoq Narsarlu kommuniugallarmat borgmesteriusimalluni.

Inatsisartuni siullermik 1984-imi ilaasortanngorpoq. 1985-imiilli Danmark lærer Højskolemi ilinnialersuni aallartilluni. Inatsisartunut 1987-imi ilaasortanngoqqippoq. Narsami kommunalbestyrelsemi 1989-imi qinigaangami qinigaaffik tamaat borgmesteriuvoq.

Torben Emil Lynge ilinniartitsisutut ilinniagaqarpoq, erneratalu Miki Lyngep oqaluttuaraa ataatami ilisimasat ingerlateqqinnissaat soqutigisarilluinnarsimagaa.

- Torben Emil Lynge inuiaqatigiinni qaammarsaanermut pingaartitsisuuvoq, Narsamilu Narsami Aviisimik saqqammersitsisarsimavoq suleqatigisani ilagalugit. Ilinniartitsisuunermini atuarfimmilu pisortaanermini atuartunit ataqqineqarluartuuvoq atuartut tamaasa assigiimmik oqaloqatigisinnaasaramigit, ilinniartitsisoqatiminillu aamma ataqqineqarluarluni. Immikkut pikkoriffigai oqaatsit, pingaartumik kalaallisut danskisullu, Miki Lynge oqaluttuarpoq.

Paasisat kalaallisuunngortinnissai pingaartikkaa

Miki Lynge oqaluttuarpoq Torben Emil Lyngep pingaartilluinnarsimagaa atuakkat kalaallisut aamma atuarneqarsinnaanissaat.

- Atuarneq nuannarisaraa, ilisimasanik ujartuiuartuuvoq, atuarnikuusaminillu paasissutissanik ingerlatseqqikkusuttarluni. Atuakkalli nuannarilluinnaraangamigit kalaallisuunngortittarpai, inuiaqatigiinni kalaallisuinnaq oqaaseqartunik atuakkiat taakku atuarneqarsinnaaniassammata, Miki Lynge oqarpoq.

Torben Emil Lynge Atassummi ataqqinaammik ilaasortanngortinneqarnikuusimavoq, Demokaatinulli 2007-imi ilaasortanngorsimalluni. Kommune Kujallermi kommunalbestyrelsemi 2008-mi qinigassanngortikkaluarpoq, qinigaananili.

Torben Emil Lyngep eqqumiitsuliortoq Hans Lynge ataatagaa.