Royal Greenland
Narsami nipisat suaat marloriiaatinngortut
Narsami Royal Greenlandip tunisassiorfiani ulapaartoqarpoq.
Narsami Royal Greenlandip tunisassiorfiani ukioq manna nipisat suaannik tunisassiat siornamut sanilliullugit marloriaataat sinnerlugit qaffariaateqarput.
Nipisat suaat siorna Narsami Royal Greenlandimi tunisassiorfimmut tunineqarsimasut 15 tonsiupput, ukiormannalu nipisat suaat 40 tonsit tunineqarlutik, Royal Greenland nittartakkamini allappoq.
- Ukioq naallugu tunisassiorfitsinni pingasunik sulisoqartarpugut, aasarli manna tunisassiat ingerlalluarnerisa kingunerisaannik sulisut arfineq-pingasuupput tamanna qujarutissaavoq, Narsami tunisassiorfimmi pisortaq, Niels Sakariassen oqarpoq.
Narsami Royal Greenlandip tunisassiorfiutaani nipisat suaasa tunisassiarineqarnerisa saniatigut aalisakkat assigiinngitsut sisamat tunisassiarineqartarput tassaasut, qalerallit, suluppaakkat, qeeqqat saarulliillu.