Narsami sullissiumatooq ilungersortoq: Illoqarfimmi innuttaasunit taperserneqarnissamik amigaateqartoq
Kalaallit Nunaanni Politiit Kommuni Kujallermi meeqqat inuusuttullu ikiorserniarlugit isumassarsiarpassuaqartoqarlunilu suliniuterpassuaqartoqarnera nuannaarutigaat. Narsalli timersortarfiani inspektørip Susanne G. Lyngep pissutsit allarluinnartut isigai. Taassuma namminneq kajumissutsiminnik iliuuseqarsinnaasut ujartorpai.
Kommuni Kujallermi najukkami siunnersuisoqatigiit politiinit kommunimillu sinniisuutitat peqatigalugit kommunimi illoqarfinnut nunaqarfinnullu tikeraarsimapput, tassani Kujataani inuusuttut pinerlunniartarnerannik pinaveersaartitsinermut atatillugu tikeraarsimallutik. Politikommissørip Søren A. Hansenip isumassarsiarpassui suliniuterpassuillu pillugit najukkami siunnersuisoqatigiit pissarsiarisimasaat kakkagilluinnarpai.
Kikkulli tamarmik suliniutigineqartunut kakkaginninngillat.
Timersortarfimmi inspektøri isikkamillu arsarnermi sungiusaasoq Susanneq G. Lynge Narsami sullissiumatuujuvoq. Illoqarfimmi meeqqat inuusuttullu sammisassaqartinneqarnissaat akisussaaffittut tigusimavaa. Susanne G. Hansenilli suliassaq kisimiilluni isumagisinnaanngilaa.
Suleqatinilu upernaaq Narsap timersortarfiani cafeteria arfininngornikkut nalunaaquttap 19-ip 21-llu akornanni ammatittalersimavaat. Ammatinneqartalernera nuannarineqarluarsimavoq, tassani meeqqat inuusuttullu 40-t angullugit amerlassusillit - timersortarfimmi inspektøri naapertorlugu - unnukkut pinnguariartarsimallutik. Suliniulli marloriarluni atorneqareersoq taamaatiinnarneqartariaqarsimavoq.
- Angajoqqaanit innuttaasunilluunniit tapersersorneqanngilanga, taanna tunngavilersuilluni oqarpoq.
- Meeqqat eqqumaffigineqarnissamik amigaateqartut
Susanne G. Lyngep qularutiginnginnerarpaa, suliniut illoqarfimmi meeqqat inuusuttullu serlersaarisinnaanerannik, tillinniarsinnaanerannik naamaarniarsinnaanerannillu pinaveersaartitsisinnaasoq, tamannali ilutsinneqassappat angajoqqaat kommunilu tapersersuisariaqartut oqaatigalugu. Timersortarfimmi inspektørip qanga pissutsit maqaasinerarpai, qangami angajoqqaat meeqqaminnik sammisaqaqateqartarsimapput.
- Isumaqarpunga meeqqat eqqumaffigineqarnissartik amigaatigigaat.
Susanne G. Lyngep nassuiaatigaa, suliniuteqarnermi siunertarineqarsimasoq angajoqqaat meeqqatillu ataatsimuualaaqatigiittarnissaat. Siunertaasimanngilaq angajoqqaat ulappunnerat pissutigalugu meeqqat timersortarfimmut tunniutiinnarneqartarnissaat, taanna oqarpoq:
- Bobspil, skak, matador, lego aamma ludo sammitittarsimavagut. Namminnerli kajumissutsiminnik ikiuukkusuttoqanngimmat tamanna ajoraluartumik unitsinneqarpoq.
Unnuarissatut iliuuseqarsimasut
Susanne G. Lyngep qularutiginnginnerarpaa, Narsami meeqqat inuusuttullu iliuuseqarfigineqarnerunissaat.
- Maani illoqarfimmi innuttaasut taamatut oqariartuuteqartunga nalunngilaat, taanna oqarpoq nassuiaatigalugulu, allat marluk peqatigalugit tallimanngornermi unnukkut nalunaaquttup 22-p 01-illu akornanni aqqusinermi angalaarsimallutik:
- Soorlu unnuarissatut, taanna oqarpoq, nassuerutigaluguli ataasiannaarlutik taamatut iliuuseqarsimallutik, - Susanne G. Lyngep oqarneratut - angajoqqaat innuttaasullu allat pisuttuqataasimanngimmata:
- Maani illoqarfimmi iliuuseqarniarneq ajornartarpoq. Maani illoqarfimmi oqartoqartarpoq: "Una amigaataavoq aamma una amigaatqaavoq", arlaannilli iliuuseqartoqaraangat tapersersuisoqassanani.
Susanne G. Lyngep allanngueqataarusukkaluarluni nassuerutigaa, nammineq kajumissutsiminik iliuuseqarniartarnini killilersimallugu.
- Neriuutigiuaannarpara innuttaasunit angajoqqaanillu taperserneqarnissara.