Nassuiaat: Inoqarfiit makku pingaartumik unammillernartoqartitsipput
Nuna tamakkerlugu pilersaarusiorneq pillugu nassuiaatip nutaap inoqarfiit 14-it 50-init ikinnerusunik innuttaasoqartut maluginiaqquai.
2016-imi nuna tamakkerlugu pilersaarusiaq oqaaseqatigiit pissutigalugit tunuartinneqarpoq, tassani nunaqarfiit navianartumiittut pilersaarutaasumik matuneqarnissaanik oqallissaarisoqarmat. Politikkikkut tamanna akuerineqanngilaq, Naalakkersuisullu taamani siulittaasorisimasaata Kim Kielsenip, nassuiaammik nutaamik ukiup tulliani suliarinnittoqarnissaa ilisimatitsissutigaa.
2023-mi maanna Naalakkersuisut 'Nuna tamakkerlugu pilersaarusiorneq pillugu nassuiaammik' nutaarluinnarmik tusarniuteqarput. Nassuiaammi inoqarfiit matuneqarnissaat oqaatigineqanngilaq, kisianni najugaqariaatsimi maanna pissutsit misissuiffigai, ilaatigullu innuttaasut katitigaanerat pissutigalugu inoqarfiit arlallit immikkut unammilligassaqartut oqaatigineqarpoq.
Inoqarfiit minnerit 50-it inorlugit innuttaasoqartut pineqarput, taakkunanilu nassuiaammi unammilligassat makku erseqqissarneqarput:
- Inoqarfinni minnerpaani innuttaasut medianalderiat inoqarfinnut allanut sanilliullugu qaffasinneruvoq.
- Inoqarfinni minnerpaani, inoqarfinnut allanut sanilliullugu utoqqaat immikkut ittumik amerlanerujussuupput.
- Inoqarfinni minnerpaani, inoqarfinnut allanut sanilliullugu arnamut angutit amerlassusaat immikkut ittumik qaffasissorujussuuvoq.
Pingasunit marluk angutaapput
Inoqarfinni minnerpaani agguaqatigiissillugu ukiut maannakkut 39-t missaanniipput, tamannalu illoqarfiit pingaarnersaannit ukiunik sisamanik qaffasinneruvoq.
- Tamanna ernumanartuunngilaq, kisianni ukiuni aggersuni innuttaasut timikkut qanoq piginnaatiginerannut sunniuteqariartussaaq. Agguaqatigiissillugu ukiut qaffasikkaangata, tamanna takussutissaasarpoq inunngortunit toqusut amerlanerusarnerannut, tamatumalu kingunerisarpaa innuttaasuni ikileriaateqarneq, nassuiaammi allaqqavoq.
Suiaassutsit agguaqatigiissinnerinut tunngatillugu innuttaasut pingasuuppata marlunnit amerlanerusut angutaasartut nassuiarneqarpoq.
- Tamanna angutit arnallu amerlassusaanni naleqqiussinermi attanneqarsinnaanngilaq. Taamaattumik inoqarfinni minnerpaani inuiaqatigiinni aaqqissugaanermi matumani kisitsisit pingaarutillit immikkut unammillerfiupput, taama allaqqasoqarpoq.
Inuiaqatigiit aaqqissugaaneranni kisitsisit pingaarnerit politikkikkut suliniutit suut nunatsinnilu inoqarfiit kiffartuunneqarnerinut pisariaqartitanut piffissaq qaninnerusoq ungasinnerusorlu eqqarsaatigalugit atorneqarsinnaasut, nassuiaammi oqaatigineqarpoq.
Inoqarfiit pillugit ilisarnaatit suliarineqartut
Nassuiaammilu aamma inoqarfiit ilisarnaataannik nutaanik sulianik imaqarpoq.
Inoqarfiit assigiinngitsunut arfinilinnut immikkoortiterneqarput, isumaginninnermi sanngiiffiit aamma aningaasaqarnikkut sanngiiffiit uuttuutigineqarlutik.
Uuttuummi appasinnerusumik angusaqarneq pitsaanerusoq.
Ataani tabelimi takuneqarsinnaasoq malillugu inoqarfiit mikinerutillugit uuttuummi angusaq qaffasinnerusarpoq:
- Sanngiiffiit aamma inoqarfiit angissusaata akornanni ersarissumik ataqatigiissoqartoq. Inoqarfik angineruppat, inoqarfiup sanngiiffiata appasinnerunissaanut ilimanaateqarnerusarpoq, paarlattuanik takuneqarsinnaavoq, inoqarfik minneruppat inoqarfiup sanngiiffiata qaffasinnerunissaa ilimanaateqarnerusarpoq, nassuiaammi allaqqavoq.
Nassuiaat 22. marts tungaanut tusarniutigineqarpoq.