NATO-p pisortaa Trumpip oqaasii pillugit: Tamatta isumannaatsuunissarput akorngusersorpaa
Nuna Natomut akiliuteqanngitsoq illersorumanagu USA-mi præsidentiusimasoq Donald Trump oqarpoq.
NATO-mut saassussinerit suulluunniit sakkortuumik akineqassapput.
Aamma NATO-mi ilaasortaasut imminnut illersorniarnatik oqarpata, tamanna NATO-mi ilaasortaasut tamarmik isumannaatsuunerannik navianartorsiortitsissaaq.
Norgemi tusagassiorfik VG naapertorlugu NATO-p generalsekretæria Jens Stoltenberg sapaatiummat ualikkut oqaaseqarnermini tamanna erseqqissarpaa.
Jens Stoltenberg oqarpoq: "Iligiit imminnut illersorniarunnaarnerannik takussutissaqarneq tamatta isumannaatsuunitsinnut, aamma USA-p isumannaatsuuneranut, ajoqutaavoq, aamma Amerikamiut Europamiullu sakkutuui navianartorsiortinneqarnerupput."
Trumpip nalunaarutaa akerleriissutaasoq
Taamatut nalunaaruteqartoqarpoq Donald Trumpip arfininngormat nunat NATO-mut ilaasortaasut akiligassaminnik akiliinngitsut illersorniarlugit piumassuseqarnani tupaallannartumik oqaaseqarnerata kingorna.
Trumpip oqaasii South Carolinami qinersisartunik ataatsimiisitsinermi oqaatigineqarput, tassani præsidentiusimasup Nato-mi siulersuisunik præsidentiunermini ataatsimeeqateqarsimanerminik eqqaasaqarmat:
- Nunami angisuumi præsidenti nikuippoq oqarlunilu: "Akiliinngikkutta Ruslandimit saassunneqassaagut - taava illersussavitigut?’”
- Akivakka: "Akiliinikuunnginnavit?" Akivaanga: "Aap, taamaassimagunarpoq." "Naamik, illersornianngilakkit. Qanorluunniit piumasamittut iliorsinnaasut kaammattussavakka, kisianni akiliisariaqarputit."
- Paatsiveerusimaartoq
Tamatuma kingorna Det Hvide Hus-ip sakkutuunik iligiinnik saassussinissamut kajumissaarinera "amiilaarnartutut paatsiveerusimaartutullu“ taavaa.
Jens Stoltenbergip sapaatiummat erseqqissarpaa NATO ilaasortanik tamanik illersuinissaminut piareersimasoq.
- NATO iligiinnik illersuinissaminut suli piareersimallunilu sapinngilaq. NATO-mut saassussineq sunaluunniit ataatsimoorluta sakkortuumik akiussavarput.
- Naatsorsuutigaara kinaluunniit præsidentinngortuuppat USA NATO-mik suleqateqarumaartoq, Stoltenberg VG naapertorlugu oqarpoq.
Donald Trump USA-mi præsidentimut qinersinissami Republikanerit partiiannit qinigassanngortinniarluni ilungersorpoq.
Aamma partiimit qinigassanngortinneqarnissaa ilimanarpoq.
/ritzau/