Natsersuit paasissutissanik katersuipput
Tunimi natsersuit nassitsissutilersorneqarsimasut katersaat silap allanngoriartorneranik paasisanut iluaqutaapput.
Ilisimatuussutsikkut atuagassiami Nature Geosciencemi allaaserisaq ulluni makkunanerpiaq issuarneqaqattaarpoq. Sermersuarmi iigartartut aannerinut immap sunniutaa pillugu allaaserisaq nunarsuaq tamakkerlugu tusagassiuutini eqqartorneqaqattaarpoq.
Allaaserisamut tunngaviupput ilaatigut nunatsinni natsersuup katersai paasissutissat. Paasissutissat taakku katersorneqarput Pinngortitaleriffiup ilisimatuussutsikkut misissuinermut suliamut peqataaffigisaanut tunngatillugu, Pinngortitaleriffik nittartakkamini allappoq.
Kulusumi Tasiilamilu piniartut peqatigalugit ilisimatuup Aqqalu Rosing-Asvid, Pinngortitaleriffimmeersup, aammalu ilisimatuut Canadameersut, natsersuit uumatillugit Tasiilap eqqaani qaammataasakkut aallakaatitsisartulinnik nalunaaqutsersorsimavaat.
Natsersuup ingerlaartarnera aqqartarneralu misissuinermi pingaarnerpaatillugit sammineqarput, aammali aallakaatitsissutit sensoreqarput immap assigiinngitsumik itissusilimmi kissassusaanik uuttortaasinnaasunik.
Paasinarsisimavoq natsersuit inersimasut ukiukkut Canadami piaqqiortarfimminukaasartut, natsersuaaqqalli suli kinguaassiorsinnaanngitsut ukioq tamaat Tasiilap eqqaaniittartut.
Natsersuaaqqat taakku ukioq tamaat sila qanoq ikkaluaraangalluunniit aammalu sikup ataani immami nillertumit ilisimatuut namminneq katersiffigisinnaanngisaanni paasissutissanik katersisimapput.
Maanna ilisimatuut iigartartoqarfinnit timmut milleriarsimanerpaat nalaanni ukioq tamaat kissassutsimik nalunaarsukkat pigilersimavaat, nittartagaq allappoq.