Nauja Lyngep qineqqusaarnermi naalagaaffeqatigiinneq sammisanngortinniarpaa
Oqallitsitsisartup danskit partiivisa naalagaaffeqatigiinnermi atugassarititaasut aqqusaarneqartartullu pillugit 'eqqartuiumanngittarnerat' atorunnaarsinniarpaa.
Qineqqusaarnermi naalagaaffeqatigiinnerup sammineqarnerunissaa anguaniarlugu, oqallittartoq Nauja Lynge folketingimut qinersinissamut peqataalerpoq.
Nauja Lyngep sammisassai qulit
1. Suleqatigiilluta tunngavipput nukittorsassavarput, naleqaqatigiinneq ataatsimoornermi pilersinneqartarmat.
2. Kalaallit savalimmiullu inissaqartissavagut, ikinnerussuteqartullu tusaanerulerlugit (tassani pineqarput kalaallit Danmarkimiittut, tunumiut, qallunaat Kalaallit Nunaanniittut, savalimmiut Danmarkimiittut il.il), naleqaqatigiinneq assigiinngissutsip akuerineranik aallaaveqarmat.
3. Naalagaaffimmit tapiissutit assersuussinertut ilisimatitsissutigineqartalissapput, qallunaat paasiniassammassuk aningaasat qanoq naleqartiginersut, Danmarkillu issittumi naalagaaffittut inissisimanini qanoq pissarsiaqarfigisarneraa.
4. Naalagaaffeqatigiinneq meeqqat atuarfiini atuartitsissutigineqartalissaaq - issittumilu naalagaaffimmi innuttaasuunerput ilinniassavarput.
5. Pinerluffigitittutut misigineqa peerneqassaaq.
6. Nunap killiini aporfiit piiassavagut naalagaaffeqatigiinnermilu innuttaasuuneq oqinnerulersillugu.
7. Naalagaaffeqatigiinneq nittarsaatissavarput, mittarfimmi erfalasut pingasut saqqummerlugit “Naalagaaffeqatigiinnerullu Illuutaanut” innersuussisinnaassalluta, tassani danskit naalagaaffiat tamakkerlugu ilisimasanik aallertoqarsinnaalissalluni.
8. Kalaallit Nunaannut Savalimmiunullu timmisartorluni angalanermut akit appassavagut.
9. Kalaallit Nunaanniit Savalimmiuniillu naalakkersuinikkut piumasaqartoqartillugu, naalagaaffeqatigiinnerup qimannissaanut aalajangertoqartinnagu isornartorsiuisut ilanngunneqartassapput.
10. Naalakkersuinikkut pigut aallaavigalugit tunngaveqassaagut, siunissarput sinnattugullu tunngaviginagit. Siunissarput tunngaveqarpoq pisimasunik puigunngikkaluarluta iparaanissatsinnit, uppertikkuminanngikkaluarlutalu siumut isigisinnaanissatsinnit. Naalagaaffeqatigiinneq piuvoq, tamanna oqallinnermi tunngaviusariaqarpoq.
- Namminersulivinnissaq, siunissami pisinnaagunartoq, eqqartortariaqanngilarput. Oqallinneq ullumikkumut utertinneqassaaq, naalagaaffeqatigiinnermilu inissisimaneq ullumikkutut ittoq oqallisigissavarput, Sermitsiaq.AG-mut oqarpoq.
Nauja Lynge isumaqarpoq, danskit politikerit akornanni Kalaallit Nunaanni naalakkersuinikkut pisut pillugit oqallinnissamut tunuarsimaartoqalersimasoq – tamannalu ineriartornermik ajortumik kinguneqartoq.
- Isorinnittunik, kalaallit politikeriinik unammilliisinnaasunik, pisariaqartitsivugut, oqarpoq.
Qinikkat tallimaat
Isertuunneqarsinnaanngilaq Nauja Lynge isorinnittunut ilaammat. Isorinninnerlu qineqqusaarnermi akuutissallugu piareersimavoq. Qineqqusaalinngilaq, isummalli, nunat avannarliini qinikkanit saqqummiunneqartanngitsut pillugit saqqummissalluni. Taamaasilluni nunat avannarliit qinigaatitaattut tallimaattut imminut isigivoq.
Qineqqusaalinngikkaluarlunili, qineqqusaarnermi sammisassanik qulinik allattuisimavoq, Savalimmiunit Kalaallit Nunaanniillu piumasaqartoqartillugu isorinnittut inissaqartinnissai ilaatigut anguniarlugu.
- Savalimmiunut Kalaallit Nunaannullu ingerlalluareertunik eqqusseqqittoqartariaqanngilaq, Nauja Lynge oqarpoq.
Naalagaaffeqatigiinneq pillugu qinersisartunik ataatsimiittoqartarnissaa pilersaarutaavoq, Nauja Lyngellu neriuutigaa aamma tv-kkut aallakaatitsisoqarumaartoq. Naalagaaffeqatigiinneq pillugu apeqqut partiinut attaviginnissutigisalereerpaa.