Neriuffik illumik 1,5 millioner koruuninillu tunineqartoq

Neriuffiit Kattuffiannut (Neriuffik) kræftimik eqqugaasimasunik taakkulu ilaqutaannik sullissisartumut nutaarsiassatsialaqarpoq.

Naalakkersuisummi aalajangersimapput, Rotary Kollegiet Nuummiittoq kattuffimmut akeqanngitsumik tunniunneqassasoq. Aamma illup isaterneqarnissaanut 1,5 millioner koruuninik aningaasaliisoqassaaq.

Illu ikiuni arlaqartuni kiassagaasimanngitsoq isateriaannagassaavoq, Naalakkersuisut tusagassiorfitsigut nalunaaruteqarlutik ilisimatitsipput.

Neriuffik ’Kræftimik nappaatillit illuat’-nik, ’Siunnersuisarfik’-mik taasamik, ullumikkut ilinniartut ineqarfiata inissisimaffiani sanaartorniarpoq. Illu siunnersuisarfittut peqatigiiffiullu illuattut atorneqassaaq, tassanngaanniillu nuna tamakkerlugu napparsimasunik tapersersuisarneq suliarineqartassalluni.

- Pingaarutilerujussuarnik suliaqartartoq

Neriuffik sanaartornissamut "aningaasaliisuteqartartunit, aningaasaateqarfinnit nunalu tamakkerlugu katersuiniarnernit" aningaasassanik nammineerluni pissarsisimavoq.

Ineqarnermut Attaveqaasersuutinullu Naalakkersuisoq Erik Jensen aaqqissuussamut tassunga nuannaaruteqarpoq:

- Neriuffik nunatsinni nappaassuarmik kræftimik eqqugaasimasut qanigisaallu pillugit pingaarutilerujussuarnik suliaqartarpoq, taamaattumik nuannaarutigilluinnarpara Naalakkersuisut aamma Aningaasaqarnermut Akileraartarnermullu Ataatsimiititaliap ’Siunnersuisarfik ’-iup sananeqarnissaanut pilersaarutinut tapersiinissaq isumaqatigiissutigimmassuk.

Ukiut tallimat ingerlaneranni aallartinneqarsimassasoq

- Qularinngilaralu tunniussinissaq tapiissuteqarnissarlu Neriuffiup sulineranut aammalu nunatsinni innuttaaqatitsinnut, suliniuteqarneranut iluaqutaalluarumaartoq, Erik Jensen oqarpoq.

Aningaasaqarnermut Akileraartarnermullu Ataatsimiititaliap suliamik suliarinninnermini ilinniartut ineqarfiannik Neriuffimmut tunniussinissamut piumasaqaatit arlallit saqqummiuppai.

Ilaatigut tassani pineqarpoq, ilinniartut ineqarfiannik tunniussinermiit ukiut tallimat ingerlaneranni kattuffimmit ilinniartut ineqarfiat isaterneqarlunilu illu sanaartorneqassasoq imaluunniit illu Namminersorlutik Oqartussanut utertinneqassasoq.

Neriuffimmit illu allanut aamma tunniunneqassanngilaq, kattuffik allanik pilersaaruteqalersimagaluarpalluunniit, allakkami ataatsimiititaliamit saqqummiunneqarsimasumi tamanna allassimavoq.