New Yorkimi qaartartumeerisoq tigusarineqarpoq

Ataasinngornerup ullaavani New York annikitsumik qaartitsisoqarmat tupaallaatigineqarpoq, nalunaarutillu siulliit naapertorlugit pisoq inuup inuuneranik naleqarsimanngilaq.

Reuters naapertorlugu, New Yorkimi borgmesterip Bill de Blasiop, qaartitsineq ”peqqarnisaarniaraluarnertut” taavaa.

- Qujanaqisumik qaartartumeerisup anguniakkani angunngitsoorpaa, tusagassiuuteqarfiit arlallit naapertorlugit borgmester, oqarpoq.

Taassuma ilassutigaa, qaartartumeerisoq massakkut politiinit tigummisaasoq, kisimiilluni qaartitsisimasoq.

AP naapertorlugu, qaartartumeerineq ”pisoq peqqarniisaarnianut attuumeqassuteqartoq” illoqarfiup politikommissæria oqaatigaa.

AP naapertorlugu politiit paasissutissiipput, 27-nik ukiullip qaartartumeerisup, nammineq qaartartuliaq timinut aalajangersorsimagaa.

Qaartartup qaarnerani assammigut naamigullu nammineq aamma uutiterpoq, napparsimavimmullu unitsinneqarsimavoq.

Taassuma saniatigut inuit pingasut annertunngitsumik ikiligaapput. Taakku niaqorlunnertik siutimillu sianerpalunnerat, anniaatigaat.

Politeeq aqqunartut ilagaat, New Yorkimi umiarsualivinnut oqartussat, Twitterimi paasissutissiipput.

Pisoq, nunap iluani – Times Square-p eqqaani, bussit unittarfiata eqqaani – pivoq. Qatserisartut biilii ikiuianasuartartulli arlallit sumiiffimmut ornigutsinneqarput.

Pisoq pillugu præsident Donald Trup paasitinneqarsimasoq, Det Hvide Hus-imi arnaq oqaaseqartartoq Sarah Sanders, Twitterimi allappoq.

Qaartartumeerisoq Islamisk Stat-imut isumassarsiortartuuvoq, paasissutissallu maannamut pissarsiarineqarsimasut naapertorlugit peqqarnissaarnianut toqqaannartumik attuumassuteqarsimanngitsoq, AP naapertorlugu, politiit tusarfii – atii isertuussat – oqarput.

Tusarfiit arlallit naapertorlugit 27-nik ukiulik qaartartumeerisoq, ataasinngornermi ullaakkut ulapinnerup nalaani nalunaaqutaq 7.30 – 13.30 danskit nalunaaqutaat –,qaartartuutini qaartippaa.