Niisarnarniarneq aallartilluareerpoq
Aasaq manna Savalimmiuni niisarnartoqarluarpoq. 2008-mi pisaqartoqarsimanngivippoq 2009-milu niisarnat ingerlaaqatigiit pingasuinnaat katillugit 310 toqunneqarput.
Niisarnat ingerlaaqatigiit siulliit katillugit 69-it Sandoy-mi juunip 5-ianni pisarineqarput, Kristian Dahl oqaluttuarpoq.
Tamatuma kingorna juunimi juulimilu tallimariarluni pisaqartoqarpoq mannalu tikillugu niisarnat 566-it pisarineqarsimapput. Niisarnat kingulliit pisarineqartut Savalimmiuni illoqarfiit annersaata tulliani Klaksvik-imi pisarineqarput, tassani juunip 19-ianni ataasinngornerup unnuaani niisarnat katillugit 228-it pisarineqarmata.
Niisarnat neqaat orsuilu illoqarfimmiunut 5.000-inut agguarneqarput, inunnullu niisarnarniarnermi peqataasunut 1.000-t missaanniittunut aamma neqinik orsumillu agguaasoqarluni.
Klaksvikimi niisarniarniarnermi nunani tamalaani avatangiisinik illersuiniaqatigiiffimmit Sea Shephardimit aallartitat najuupput, illersuiniaqatigiiffillu 1980-ikkut qiteqqunneraniilli Savalimmiuni niisarnarniartarneq akerlilersorsimavaa. Suliniaqatigiiffiup quppernerani nittartakkami Klaksvikimi niisarnarniarneq pillugu allaaserinnittoqarpoq assinillu ilisisoqarluni, kajumissaarutigalugu Savalimmiut niisarnarniarnermik ileqquat mattunneqassasoq.
Savalimmiut TV-qarfiat Sjónvarp Føroya Klaksvikimi niisarnanik toqoraanermit takutitsivoq, takuneqarsinnaalluni niisarnat ilaat toqoraanermut ataillugu inuppalaanngitsumik toqorarneqarunartut. Taamaariarmat lagtingimi ilaasortap Rúna Sivertsenip, selvstyrepartiimeersup, tusagassiorfitsigut siunnersuutigaa arfernik toqoraanermik savalimmikormiut pikkorissartinneqartassasut, aammalu niisarnarniarnermi peqataanissamut piniarsinnaanermut uppernarsaateqartoqassasoq.
Klaksvikimili sysselmandi Karl Johansen oqarsimavoq TV-kut nutaarsiasani assit takutinneqarsimasut immikkorluinnaq ittuusut, arferillu 228-it toqorarneqarnerat ajunngitsumik pissusissamisoortumillu ingerlasimasoq.
- Tamatigut ataasiakkaanik pitsaanngitsunik pisoqartarpoq arferit taama amerlatigisut ataatsikkut toqorarneqassagaangata, sysselmandi oqarpoq, taannalu isumaqarpoq immikkut pisumit assit TV-kut takutinneqartut nalinginnaasutut isigineqassanngitsut.