naalakkersuisuni ajornartorsiorneq
Nikku: Matu matorlunneqanngilaq
Partii Inuit siulittaasuata Nikku Olsenip takorlooruminaatsippaa Inuit Ataqatigiit imaluunniit Demokraatit suleqatiginissaatPartii Inuit siulittaasuata Nikku Olsenip takorlooruminaatsippaa Inuit Ataqatigiit imaluunniit Demokraatit suleqatiginissaat
Partii Inuit aamma Siumup maanna inissinniarsaraat taaseqatigiittarnissamik isumaqatigiissut inissinneqarsinnaanersoq. Partii Inuit Naalakkersuisunut maanna Siumumit Atassummillu ingerlanneqartunut illuatungiliuttunngornianngillat.
Uranimut naaggaarluinnarnerup atorunnaarsinneqarnissaa pillugu oqallinneq Partii Inuit naalakkersuisooqataajunnaarneranni qitiuvoq.
Uranimut naaggaarluinarnerup atorunnaarnissaa maanna Partii Inuit tapersersunngilaat taakku isumaqaramik apeqqut pillugu nuna tamakkerlugu taasititsisoqartariaqartoq tamannalu aatsaat pissasoq sukumiisumik paasititsiniaareernikkut. Taamatulli piumasaqarnerat naalakkersuisooqatigiit Siumup aamma Atassutip itigartippaat.
Isumaqatigiissut ingerlaqqippoq
- Piumasaqaat taanna saqqummiukkatsigu nalunngilluinnarparput naalakkersuisooqataanitsinnik kipisitsisinnaasoq. Aamma Siumup Atassutillu Inatsisartuni gruppiisa ataatsimeeqatigisarneranni tamanna qaqilertarsimagaluarparput ilalerneqarsimanatali, Nikku Olsen Sermitsiaq.AG-mut oqarpoq.
Naalakkersuisut siulittaasuat Aleqa Hammond Siumumeersoq aalajangerpoq Partii Inuit Naalakkersuisuni suleqatiginerat kipitinniarlugu. Matuli matorlunnagu taaseqatigiittarnissamik isumaqatigiissut maanna inissinniarneqarpoq.
- Naalakkersuisooqatigiinnissamik isumaqatigiissutip oqaasertaasa ilarpassui uagut ilusilersugaraagut paasivaralugu isumaqatigiissut taanna taamatut isikkoqarluni ingerlaannassasoq. Tassani politikkikkut siunnerfigut ersarissumik ilaapput. Taamaattumik Siumut taaseqatigiittarnissamik isumaqatigiissuteqarfiginiarparput, Nikku Olsen oqarpoq.
IA naagga
Partii Inuit februaarimi ukiormanna pilersinneqarput Inuit Ataqatigiit aamma Demokraatit aatsitassat aalisarnerlu pillugit suleriaasiat illuatungilerniarlugu. Partii Inuit isumaqarput innuttaasut peqataatinneqarnerat naalakkersuisut siuliisa nalaanni annikippallaarsimasoq.
- Takorloorsinnaanngilara Inuit Ataqatigiit aamma Demokraatit suleqatiginissaat taakku aalisarneq aatsitassarsiornerlu pillugit suleriaasiannut akerliulluta parteerput pilersinnikkuugatsigu, Nikku Olsen oqarpoq.