Nipilersortartut nersorneqassapput
Ukioq manna Kodap nersornaasiisarnera Qaqortup Timersortarfiani unnugu ingerlanneqassaaq ilaatigut Simon Lynge aamma Nina aliikkusersuisoralugit
Ukiut tamaasa Kodap Kalaallit Nunaanni erinniortunut erinarsuusiortunullu nersornaasiuttagaa nunatsinni tunniunneqartarpoq. Ukioq manna Qaqortumi Timersortarfimmi nersornaasiineq unnugu ingerlanneqassaaq, matut nal. 18.45 ammassapput.
Nersornaasiinerit akornanni Simon Lynge, Richard Lobb aamma Nina kiisalu Miki, Small Times Giantsikkunneersoq aliikkusersuissapput, soorlu erinniortut erinarsuusiornermik Kodap aaqqissuussaanik pikkorissartut aamma aliikkusersueqataassasut.
Unnugu kingusinnerusukkut timersortarfissuarmi Akisuanerit Festival ammassaaq, tassani Simon Lynge aamma Richard Lobb appissapput, aamma Aalut nipilersussapput taakkua ukiunik 30-nngortorsiorlutik ukioq manna nalliuttorsiorput.
Kodap Kalaallit Nunaanni nersornaasiuttagaa immikkoortunut pingasunut aggulutaavoq: "Ukioq manna nersornaat", erinniortumut imaluunniit nipilersoqatigiinnut tunniunneqartarpoq, ukiumi qaangiuttumik immikkut malunnaateqarsimasunut. "Piukkunnartumut" nersornaasiuttagaq nutaanik saqqummersitsisunut imaluunniit nipilersoqatigiinnut tunniunneqartarpoq, "Ataqqinaammik nersornaat" erinarsuusiortumut imaluunniit nipilersoqatigiinnut nunatsinni nipilersornerup silarsuaani ukiuni arlalinni immikkut ittumik malunnaatilimmut tunniunneqartarluni.
Innersuunneqartut ”Ukioq manna nersornaat”:
Henrik Højer Jensen (Kishima)
Frederik ”Kunngi” Kristensen (Kunngi)
Abel Brandt (Unnuaq Band)
”Piukkunnartutut” innersuunneqartut:
Kuno Hammond (Thornstone)
Nukannguaq Kajussen (Nukannguaq)
Pilu Grønvold (Qaammataasat)
”Ataqqinaammik nersornaammut” innersuunneqartut:
Frederik ”Kunngi” Kristensen (Kunngi)
Iisaavaraq Petrussen (Aalut)
Juaaka Lyberth (Juaaka)