Nipinik naalaarut nutaaq imaani uumasut pillugit paasisaqarfiussaaq
Qeqertarsuup Tunuani immamit nipinik toqqaannartumik aallakaatitat miluumasut imarmiut soorliit najuunnerannik paasisaqartitsissaaq.
Suliniummit nutaajulluinnartumit nunarsuarmi inuit Qeqertarsuup Tunuani immap iluanit nipinik ulloq unnuarlu ukioq kaajallugu tusarsinnaalersinneqassapput. Pinngortitaleriffik tusagassiuutitigut nalunaarummi taama allappoq.
Nipinik naalaarut nutaaq Qeqertarsuarmi Qaqqaliami 2024-mi upernaakkut ammarneqartussatut naatsorsuutigineqartoq, uumasoqarfimmi nalituumi uumasut pillugit paasisimasatsinnik annertunerulersitsissaaq.
Nipinik naalaarut ulloq unnuarlu ukioq kaajallallugu immap iluani nipinik ataavartumik immiussisassaaq. Taamaalillutik nipit nalunaarsorneqartut ilaatigut aamma uumasoqatigiiaat tamaaniittartut allannguuteqassappata allannguutaannik nassuiaassutaasinnaasussaapput kiisalu imaani inuit qanoq nipiliortitsiginersut aamma paasineqarsinnaalersussaalluni.
Tamanit tusarnaarneqarsinnaasoq
Suliniummi Qeqertarsuup illoqarfia, Issittoq pillugu misissuisarfik, Pinngortitap Oqaluttuarisaanera pillugu Naalagaaffiup Katersugaasivia, Seiche Marine Acoustic Solutions, Visit Greenland aamma Pinngortitaleriffik tamarmik suleqataapput.
- Nipinik naalaarutip pilersinnissaa pissanngatigisorujussuuarput, Qeqertarsuup Tunuani immap iluani avatangiisit uumasullu miluumasut tamaaniittut alutornartut maannamut takuneqarsimanngitsumik paasisaqarfigisussanngoratsigik, suliniummi aqutsisoq, Issittoq pillugu misissuisarfimmeersoq, Anna Olsen, oqarpoq.
- Issittumi uumasoqatigiiaanik paasinninniarnitsinni alloriarnerussaaq pingaarutilik sumiiffimmillu mianernartumik tamatuminnga illersuinissamut uagutsinnut iluaqutaassalluni.
Nipinik naalaarummit nipit katersorneqartut internettikkut livemik aallakaatinneqarnerisigut tamanit pissarsiarineqarsinnaasunngortinneqassapput, Qeqertarsuarmi tigooraavimmut, kiisalu katersugaasivinnut assigiinngitsunut saqqummersitsivinnullu Kalaallit Nunaanni Danmarkimilu. Tamatuma kingunerani kikkulluunniit internettimut attaveqartut Issittumi Qeqertarsuup Tunuani imaanit nipinik toqqaannartumik naalaarsinnaanngussapput.
Arfiviit katersuuttarfiat
Suliniutip aningaasalersornissaa pisinnaanngorsimavoq aningaasaateqarfinnit arlalinnit aningaasaliisoqarneratigut, ilaatigut Kunngissaq Frederiup nuliatalu Kronprinsesse Maryp aningaasaateqarfianit, Carlsberg Foundationimit, Aage V. Jensen Charity Foundationimit aamma Hotel Disko Islandimit.
Qeqertarsuup Tunua 2012-imi Kalaallit Nunaanni imartani sallersaasutut inissinneqartoq, miluumasunik imarmiunik assigiinngitsunik uumasoqarluartutut ilisimaneqarpoq. Sumiiffik inuit ajoqusersuinerinut malussajasuuvoq, pingaartumik umiarsuit angallannerulersimanerat immap iluani nipiliornermut sunniuteqarsinnaasoq pissutigalugu. Ilisimatusarnikkut paasinarsinikuuvoq nipit miluumasut nalinginnaasumik avatangiiseqarnerannut ajoqutaallutillu sunniisartut.
Assersuutigalugu Qeqertarsuup Tunua arfivinnut katersuuffissuuvoq. Ukiut tamarluinnaasa arfiviit 500 aamma 1.000-it akornanni amerlassusillit januaarimiit juunip aallartinnerata tungaanut katersuuffigisarpaat, uumasullu taakkua aalajangiisuusumik tamaani uumasuusarlutik.
Nipinik naalaarutaalersussaq aqqutigalugu Qeqertarsuup Tunuani immap iluani nipit soqutiginnittunit tamanit tusarnaarneqarsinnaalissapput Issittumilu pinngortitami ataqatigiiaanik tamaaniittunik asseqanngitsunik piujuartitsiniarluta suliniuteqarnitsinnut nukittorsaataassalluni. Suliniut suleqatigiinnermik ilisimatuussutsillu nukinganik nalliuttorsiutiginninneruvoq, sumiiffimmilu ilisimatusarnerup annertunerusup piujuartitsinermillu suliniutit ingerlanneqarnissaannut aqqutissiuussissalluni.