Niviarsiaq peeqqaminit persuttarneqartoq ulorianartorsiortoq
Angut 31-nik ukiulik persuttaanermi kingorna Aasiannut politiinut imminut nalunaarutigaaq
Politiit iserfigaat niviarsiaq 16-inik ukiulik annersarneqarujussuarsimasoq, taassuma peeraata 31-nik ukiullip nammineq persuttaasimanini politiinut kalerriutigereernerata kingorna.
- Ataasinngornermi ullaakkut angut politeeqarfimmut saaffiginnippoq, niviarsiamik 16-inik ukiulimmik peerarisaminik sakkortuumik persuttaasimanini nammineq kalerriutigiartorlugu. Angutip oqaluttuaraa peeqqani suli angerlarsimaffimminiittoq politiillu angerlarsimaffimmut iseramik 16-inik ukiulik naammattoorpaat, kiinaa pullattorujussuusoq, Aasianni politiini ulluinnarni aqutsisoq Aqqaluk Petersen, Sermitsiaq.AG'mut oqarpoq.
Niviarsiaq ingerlaannaq napparsimaviliaanneqarpoq sulilu tassani uninngalluni. Kiinnamigut ima annersartissimatigaaq napparsimmavimmut apuunneqarami nakorsat naliliillutik nivissap inuunera ulorianartorsiortoq.
- Niviarsiaq ajunnginnerulerpoq inuuneralu ulorianartorsiorunnaarpoq. Peerarisaa marlunngornermi eqqartuussivimmut sassartinneqarpoq, sakkortuumik persuttaasimasutut unnerluunneqassalluni. Unataaneq ukiortaami ullaaralaakkut pivoq, angullu persuttaasoq aatsaat ataasinngornikkut ullup qeqqata missaani imminut nalunaarutigiartorpoq, silattorami. Aqqaluk Petersen, Aasianni politiinit oqaluttuarpoq.