Niviarsiaqqamik atornerluisimasutut aapparisaminullu persuttaasimasutut pineqaatissinneqartoq
Angut Qaasuitsup Eqqartuussiviani niviarsiaqqamik arfineq-pingasunik ukiulimmik kinguaassiutitigut atornerluisimasutut, kiisalu aapparminut persuttaasimasutut ullumi pineqaatissinneqarpoq. Angutip pineqaatissiissut suliassanngorteqqippaa.
Qaasuitsup Eqqartuussiviata kinguaassiutitigut atornerluisimaneq aamma aapparisamut persuttaasimaneq pillugit suliaq sapaatip akunnerata siuliani aalajangiiffigisussanngorlugu suliaraa. Angut Aasianni eqqartuussiveqarfimmi suliami tallimanut tunngasunut unnerluunneqartuuvoq.
Unnerluussut naapertorlugu angutip januar 2020-mi aapparisani toqqusasseriarlugu pinngitsaalillugu issiavimmut ingitissimavaa, niaqua igaffiup nerriviusaanut tallimanit ikinnerunngitsunik anaarruttarsimallugu.
Ukiut marluk qaangiussimalersut, 14. maj 2022, angutip aapparisani persuttarsimavaa, kiinaatigut arlaleriarlugu annersarlugu toqqusassisimallugulu.
Kinguaassiutitigut tunngasunik immiussisimasoq
Suliami unnerluussutit pingasut 2022-p aallartinneraniit april 2022-p tungaanut pisimasunut tunngasuupput.
Angut suliani niviarsiaqqamik qulit ataallugit ukiulimmik, sininnerata nalaani kinguaassiutaatigut attualaarinniutigaluni videomik immiussisimasutut unnerluutigineqarpoq.
Pisumi allami angut niviarsiaqqap akulaavisigut attualaarnerata nalaani assiliisimasutut aamma unnerluutigineqarpoq.
Suliassanngortitseqqiisoq
Unnerluussisussaatitaasoq Lars Petersen ilisimatitsivoq eqqartuussiviup angut suliani tallimaasuni pisuusoq aalajangera, angullu qaammatini qulini pinerluuteqarsimasunut inissiisarfimmiittussanngortinneqartoq. Taassuma saniatigut niviarsiaqqamut 50.000 koruuninik taarsiisussanngortinneqarpoq.
Unnerluussisussaatitaasup pineqaatissiissut naammagisimaarpaa:
- Taama unnerluussinermi unnerluutigineqartoq pineqaatissinneqaraangat, qaammatit qulit pineqaatissiissutigineqartut naammaginarput, Lars Petersen Sermitsiaq.AG-mut oqarpoq.
Angutip pineqaatissiissut Nunatta Eqqartuussivianut suliassanngorteqqippaa.
- Takussavarput Nunatta Eqqartuussiviata eqqartuussiviup aalajangernera isumaqatigineraa, unnerluussisussaatitaasoq oqarpoq.