Niviarsiaraq 15-inik ukiulik: Pinngitsaaliisup eqqartuunneqarnissaanut ukiut marluk utaqqilluni artornaqaaq
Niviarsiaqqap 15-inik ukiullip Tasiilameersup Nunatta Eqqartuussiviani nassuiarsimavaa 2018-imi ukiortaap unnuaani peqqarniitsumik pinngitsaalineqarsimalluni. Unnerluutigineqartoq skærmersuakkut malinnaasinnaasimavoq.
Naasunnguaq Ignatiussen Streymoyp paniata 15-inik ukiullip ukiut marluk matuma siorna ukiortaap unnuaani pisimasut Nunatta eqqartuussiviani kingullermik sisamanngormat nassuiaatigeqqittariaqarsimavai.
Oqaluttuaraa angutip maanna 20-nik ukiullip peqqarniitsumik pingitsaalisimagaani. Niviarsiaqqalli oqaluttuaraa piffissaq taamak sivisutigisoq ingerlareersoq, immikkuualuttut tamaasa eqqaamaniarneri ajornakusoortoq.
- Siullermik eqqartuussivimi suliassap suliarineqarnissaanut ukiut marluk aappaa avillugu utaqqisimavunga. Maanna Nunatta Eqqartuussiviani suliarineqarnissaa ilanngullugu ukiut marluk sinnerlugit utaqqilerpunga. Nunattalu Eqqartuussivianiit naatsorsuutigineqarpoq piffissap taamak sivisutigisup ingerlareernerani immikkuualuttunik tamanik eqqaamannissassunga, niviarsiaraq Sermitsiaq.AG-mut allappoq
Skærmersuakkit malinnaasoq
20-nik ukiulik pingitsaaliisimasutut eqqartuussivimmi pinngitsuutinneqarsimavoq. Illersuisuata niviarsiaqqap nassuiaataa qularnartunngortissimavaa. Eqqartuussivimmilu qularnartoqarnera unnerluutigineqartumut iluaqutigitinneqarluni. Unnerluutigineqartup niviarsiaraq qanillisimannginnerarpaa.
- Eqqartuussivimmi illersuisup atoqateqarsimanermut tunngasut apersuutigisupilussuuai, akissutissannillu eqqarsarnissamut periarfissaqartinnanga sukkanerpaamik akissuteqartinniartarlunga. Tamanna nuanniittupilussuarmik misigisimavara.
Unnerluussisussaattaasut suliaq Nunatta Eqqartuussivianut suliassanngorteqqissimavaat. Nunatta Eqqartuussiviani suliassaq suli aallartinneqangilaq, 15-illi ukiulik nassuiaateqareerpoq.
Niviarsiaqqap oqaluttuaraa Nunatta Eqqartuussiviani takunnissimasutut nassuiaateqarnini ajorpallaanngitsoq. Ataaserli pingaartumik artorsaatigisimallugu.
- Isumaqatigiissutiginikuuarput unnerluunneqartoq eqqartuussivimmi isersimaqatigissanngikkiga. Isersimaqatiginngilaralu, taamaallaat digitalikkut. Skærmerujussuaq uanga anaanamalu saninnguaniippoq, unnerluunneqartoq videokkut malinnaatinneqarpoq, taamaalilluta immitsinnut takusinnaallutalu tusaasinnaalluta.
Ikiorserneqanngitsoq
Arnap inuusuttunnguup suliap erseqqissumik inerniliiffigineqarnissaa piffissami sivisuumi suli utaqqissangunarpaa. Unnerluussisussaatitaasut Sermitsiaq.AG-mut ilisimatitsissutigaat, suliassaq qaqugu aallartinneqassanersoq suli aalajangiunneqanngitsoq.
Niviarsiaraq aqqaneq-marlunnilli ukioqarluni angummit allamit kinguaassiuutitigut innarlerneqarsimavoq, angut pineqartoq Pinerluuteqarsimasunut Isumaginnittoqarfimmit nakkutigineqarluni tarnip pissusaatigut katsorsarneqartussanngorlugu eqqartuunneqarsimavoq.
Niviarsiararli nammineq tarnip pissusaatigut sukkulluunniit katsorsarneqarsimanani. Aatsaallu angajoqqaavisa Danmarkimut efterskoleriartimmassuk pisariaqartitaanik ikiorserneqarsilluni.
Niviarsiaqqap arnaata, Naasunnguaq Ignatiussen Streymoyp, piviusulersaarummi, 'Byen hvor børn forsvinder', oqaluttuaraa, tamatuma malitsigisaanik pania arlaleriarluni imminoriaraluartarsimasoq.