Nordisk Rådip Issittoq sammiuartuarniarpaa

Nordisk Rådip ataatsimiinnerani, sapaatip akunnerani matumani Reykjavikimi ingerlanneqartumi, Avatangiisinut Pinngortitallu Pisuussutaanut Ataatsimiititaliap ilaatigut Kim Kielsenimik ilaasortallip novembarip 2-anni 2010 nunat avannarliit avatangiisinut ministerii ataatsimeeqatigaat. Ataatsimiinnermi siunertaavoq uumasut assigiinngitsut amerlassusiisa kinguariartornerannik siunissami sulinerup aammalu nunani avannarlerni kemikaliat ulorianartut pillugit suleqatigiinnerup oqaloqatigiissutiginissaat.

Kim Kielsenip ataatsimiinneq immikkut atorpaa avatangiisinut politikerinut peqataasunut Kalaallit Nunaat pissutsinik inuuniarnermilu atugarisanik oqaluttuullugit. Inuuniarnermi atugassarisat, kalaallit innuttaasut pinngortitarsuaq alianaatsoq, kusanarsinnaasoq tunniussisinnaasorlu, aammataarli siulittuutigiuminaatsoq, peqatigalugu inuuniarfiat. Pinngortitaq nukiilu naalakkersorneqarsinnaanngillat, qularineqassanngilarli kalaallit inuiaqatigiit innuttaasullu pisuussutit uumassusillit atorluarlugillu illersussagaat nungusaataanngitsumik, tamannalu peqatigalugu uumasusillit amerlassusiat illersorlugu. Kim Kielsenimut pingaaruteqarpoq pinngortitamik isumaqatigiissutit tamatigut maleqatigiissasut, pissusiviusut isiginiarlugfit peqqissumik silatuumillu takunnissinnaassuseqarlouni.

Ilanngullugu novembarip 4-aanni 2010 akunnermi apeqqarissaarfimmi Kim Kielsenip uppernarsivaa finskit siulittaasoqarfiata 2011-mi issittoq issittumilu innuttaasut sammineqartuassasut, taamaasilluni nunani avannarlerni nunarsuarmilu tamarmi suleqatigiinnermi issittormiut ikinnerussuteqartut eqqarsaatigineqartassallutik.

Debora Kleistip, Inatsisartuni Peqqissutsimut Ataatsimiititaliami ilaasortap, Reykjavikimiinnini iluatsilugu nunap napparsimmavissua, nunatsinni peqqinnissaqarfimmik suleqatiginnittoq, pulaarnaa. Pulaanermini naalungiarsunnut immikkoortoqarfik arnanullu immikkoortoqarfik takuniarpai, tassani iviangikkut illissakkullu kræftertut katsorsarneqarnerat ilisimatusarfigineqarsimammata. Debora Kleistip pulaarnini pissarsiffigilluarnerarpaa, ilaatigut maluginiarsimallugu ivianginik misissuisoqarsinnaasoq umiarsuarmik angalalluni pitsaaliuinermillu iliuuseqarluni.

Debora Kleist aamma novembarip 3-anni 2010 Atugarissaarnermut Ataatsimiititaliaq peqatigalugu Nordisk Handicappolitik Rådip saqqummiussinerani peqataavoq. Ataatsimiinnmermi Debora Kleistip immikkut maluginiarpai FN-ip innarluutilinnut isumaqatigiissutaata nunani avannarlerni tamani atuutilersinneqarnissaanik anguniakkat inassuteqaatillu. Innarluutilinnut isumaqatigiissummi ilaatigut periarfissiisoqarpoq innarluutillit atuartinneqartassasut ilinniagaqartinneqarlutillu. Debora Kleistip aamma nuannaarutigaa Nordisk Handicappolitik Rådip erseqqissaatigimmagu pingaaruteqartoq innarluutillit sapinngisamik annertunerpaamik sulisartoqarnermut akulerutsinniarneqartassasut.