Norgep inatsisartuisa immap itisuup naqqani aatsitassarsiorneq akuersaarpaat

Norgemi Inatsisartuni amerlanerussuteqartut marlunngornermi aalajangiipput aatsitassat pilerigineqaqisut immap naqqaniittut misissorneqarsinnaallutillu piiarneqarsinnaalissasut.

Aatsitassarsiornermik ingerlatsineq issittup imartaani Norgep Kalaallillu Nunaata akornanni ingerlanneqarsinnaalissasoq taamaalilluni aalajangiunneqarpoq.

Taamak allaaserinnippoq norskit nutaarsiassaqartitsiviat NTB.

Norskit naalakkersuisui naapertorlugit aatsitassat norskit imartaaniittut pineqartut piumaneqarnerat annertusiartortussaavoq.

Tamatuma ilutigisaanik norskit naalakkersuisui isumaqarput aatsitassat pisariaqartinneqartut tungaasigut Norgep imminut pilersornerulernissaa pingaaruteqartoq, innersuussutigineqarporlu piffissami maanna nalaanneqartumi nunarsuarmioqatigiit najummatsisimanartorsioqqajaanerat.

Isornartorsiuisut aarleripput uumasut naasullu pitsaanngitsumik sunnerneqassasut

Paarlattuanik pilersaarummut isornartorsiuisut tikkuarpaat immap itisuup naqqani aatsitassarsiortoqalissappat tamanna immap uumasuinut naasuinullu kingunipilutsitsissasoq.

Arbeiderpartiet aamma Senterpartiet, norskit naalakkersuisuisa partiivi, decemberimi Fremskridtspartiet aamma Høyre isumaqatigiissuteqarfigivaat immap itisuup naqqani Norge aatsitassarsiorsinnaalissasoq.

Tamatuma malitsigisaanik norskit Inatsisartuisa taassissutigisussanngornikuuaat.

Sosialistisk Venstreparti, Rødt, Venstre, Miljøpartiet De Grønne og Kristelig Folkepartii siunnersuummut akerliullutik taasipput.

Partiit taakku inatsisissatut siunnersuummut oqaaseqaamminni allapput, norskit naalagaaffiata immap aatsitassarsiorfissatut ammaanneqartup avatangiisitigut qanoq ittuunera pillugu ilisimasaat 99 procentimik amigaateqartut, NTB allaaserinnippoq.

Suliniaqatigiiffiit: Ajorluinnarpoq

Greenpeace Danmark Ritzau-imut allappoq, avatangiisit illersorniarlugit suliniaqatigiiffiit arlalissuit - Greenpeace ilanngullugu - marlunngornerup ualiani Oslomi Inatsisartut silataanni akerliussutsimik takutitsisimasut.

- Ajorluinnarpoq isigalugu, norskit naalagaaffiata immap uumasuisa naasuisalu pinngortitaassusiat innarlerneqarnissaannik kinguneqarsinnaasumik alloriarnera. Sumiiffik pineqartoq nunarsuup imartaani issittup imartaani uumassuseqartuni isumannaatsutuanngornikuuvoq, taamak oqarpoq Amanda Louise Helle, Greenpeacep suliniartuisa ilaat.

- Tamaviaassaagut suliffissuaqarneq taanna sequtserisussaasoq unitsinniarsaralugu, tamannalu sapinngisamik unitsinniarsarissavarput suliluunniiit aallarteriartoqanngitsoq, taanna allakkatigut qisuariaammini erseqqissaavoq.

Norskit naalakkersuisuisa immap itisuup naqqani aatsitassarsiorsinnaanermik isumassarsiaq junimi siorna saqqummiuppaat. Taamanikkut tunngavigineqarpoq norskit naalakkersuisuisa siunnerfigigaat Tunup sineriaata imartaa (Grønlandshavet), Norgei imartaa (Norskehavet) aamma Barentip imartaa (Barentshavet) aatsitassarsiorfissatut ammaanneqassasut.

Aatsitassarsiorfik nutaaq matumani pineqartoq Norgep Kalaallillu Nunaata akornanniippoq, tassanilu assigiinngitsunik aatsitaassaqarfeqarpoq, taamaattorli uuliaqaranilu gasseqanngilaq.

/ritzau/