Norsaq ingerlaaqqilerpoq

Air Greenlandip atlantikoq ikaarlugu timmisartuutaa Norsaq sapaatip-akunnerata siuliani Kangerlussuarmiitillugu suluata aappaa tummeqqanit kalluarneqarami ajoquserpoq.

Timmarsartoq ilaasunik assartugassanillu ulikkaartoq nunamigiinnartarialersimalluni.

Air Greenlandimit maanna nalunaarutigineqarpoq, Norsaq iluatsittumik iluarsaaneqareerluni maanna ingerlaaqqilersoq.

- Suliamut akuusut tamarmik pitsaalluinnartumik sullissilluarnerisa kinguneranik, timmisartorsuaq ippassaq Københavnip tungaanut aallarsinnaalerpoq, Air Greenlandimi timmisartorsuarmut teknikkimut pisortaq Henrik Keil oqarpoq.

Kingoraartissat Miamimeersut

Air Greenlandimit ilisimatitsissutigineqarpoq, coronap tuniluunnerata kingorna kingoraartissanik pissarsiniartarneq iluatsikkuminaatsinneqartarsimasoq. USA-mmiittumili Miamimi Norsamut kingoraartissanik iluatsitsilluni pissarsisoqarsimasoq:

- Marlunngornermi Europami kingoraartissanik nioqquteqarfinni ujaasinermut iluatsinngimmat, aqaguani attavigisartakkatsinnut ikiortissarsiorpugut. Taamaasilluta USA-mi Floridami Miamimi, siusinnerusukkut niueqatigisimanngisatsinnut, attaveqalerpugut. Suliassalli ingerlaqqinnginnerini taakku pappiaqqatigut uppernarsaataat eqqortuunersut qulakkeeqqaartussaavarput.

- Uppernarsineqarmatalu pisiassatsinnik inniminniineq aammalu aningaasat nuunneqarnissaasa piareersarnerat aatsaat inissippat, suliassaq ingerlaqqissinnaavoq, Henrik Keil oqaluttuarpoq.

Atortussat US Airforcemit assartorneqarsimasut

Kingoraartissat karsini marlunni 4,5 meterinik takissulilinniittut Kangerlussuarmut apuunneqartussaammata, Air Greenlandimit timmisartumik attartornissaq aalajangiunneqarsimavoq. US Airforce kingoraartissanik assartuisussatut tassani iluatsinneqarsimalluni.

- Ataasinngormallu teknikerit SAS-imeersut tikipput, timmisartullu suluusaanut aquutit ikkussornerinik suliarqarnitsinni ikiuullutik. Suliaq pissanganarsimavoq, ulapissimaqaallu, unnuakkulli sininnissamut periarfissaqarsimapput, Henrik Keil oqarpoq.

Norsaq sisamanngornermi ilaasunik angallasseqqilissaaq. Novembarillu aqqarnani 2002-mi ilaasunik angallasseqqaarnermini ukiunik 20-nngortorsiussalluni.