Norsaq pingasunngornermi taamaatiinnarneqartoq
Københavnip Kangerlussuullu akornanni pingasunngornermi timmisartuussinissaq teknikkikkut ajornartorsiuteqartoqarnera pissutigalugu taamaatiinnarneqarsimavoq.
Air Greenlandip Danmarkimut Danmarkimiillu ilaasussaasa pingasunngornermi timmisartussartik ilaaffigisinnaanngilaat.
Københavnimmi Kangerlussuullu akornanni timmisartuussinissaq taamaatiinnarneqarsimavoq. Air Greenland nittartakkamigut taamatut ilisimatitsivoq.
Sapaatip-akunnerata ataatsip matuma siornatigut timmisartorsuarmi sulisut coronamut atatillugu angerlarsimaannartariaqarsimapput, Air Greenlandilu timmisartuussinissamut pilersaarut ingerlatiinnarniarlugu Spaniamiut timmisartuannik attartortariaqarsimalluni. Matumanili timmisartumi teknikkikkut ajornartorsiuteqarneq pissutaavoq.
- Ilaasussat eqqugaasut tamaasa allamut ilaaffissarsiuullugit suliaqarpugut. Angalanissamut pilersaarutit nutaat kingusinnerpaamik ulloq 5. januar nunatta nalunaaqutaa malillugu nal. 12.00 saqqummiunneqassasoq naatsorsuutigineqarpoq. Paasissutissat kingulliit www.airgreenland.dk aqqutigalugu pissarsiarisinnaavatit, timmisartuutileqatigiiffik allappoq.
Air Greenlandimit Sermitsiaq.AG-mut ilisimatitsissutigineqarpoq, kingoraartissat Tysklandimut inniminnerneqarsimasut, taakkulu sisamanngornerup ullaavani Københavnimut anngunnissaat naatsorsuutigineqartoq.
Nittartagaq naapertorlugu, Kangerlussuaq Københavnilu kisimik sunnerneqarsimapput, tassa nunami timmisartuussinissat ingerlaannassapput.
Juullimi angallannerit arlallit taamaatitsiinnarnermit sunnerneqarsimapput.