Ussassaarut
Nukissiorfiit 400.000 kr.-t sinnerlugit peqquserluffigineqarsimasoq
Namminersorlutik Oqartussat ingerlatseqatigiiffiutaat faktura atorlugu peqquserluffigineqarsimavoq.
Nukissiorfiit upernaaq nuannerpallaanngitsumik suliassaqalersimapput, tassami suliffeqarfik faktura atorlugu peqquserluffigineqarsimagamik.
Nukissiorfiit Inatsisartut Kukkunersiuinermut Ataatsimiititaliaanut ilisimatitsissutigaat, peqquserluuteqarsimaneq suliffeqarfimmut 442.776,44 koruuninik naleqarsimasoq.
Ataatsimiititaliaq nunatta karsiata naatsorsuutaannik suliaqarnermut atatillugu suliamut apeqquteqarsimavoq. Polikkerit tassunga atatsillugu aamma Nukissiorfiit aningaasaqarnerat misissorsimavaa, suliffeqarfik naalakkersuisoqarfimmut toqqaanartumik attuumassuteqarmat.
Ussassaarut
Nukissiorfiit ukiumoortumik naatsorsuutaasa misissorneqarnerannut atatillugu kukkunersiuisarfik Deloitte allappoq:
Fakturat peqquserluutaasimasut avataaneersuusut
- Aqutsisut ilisimatitsissutigisimavaat, suliffeqarfik 2021-mi upernaakkut fakturat atorlugit peqquserluffigineqarsimasoq (avataanit fakturat peqquserluutigineqarsimasut), peqquserluuteqarnerullu unitsinneqarnissaata tungaanut suliffeqarfik 500.000 koruunit missaannik annaasaqarsimasoq.
Kukkunersiuinermut Ataatsimiititaliaq suliamut atatillugu annertunerusumik nassuiaaqqusisimavoq, tassungalu atatillugu Nukissiorfiit ilaatigut akissutigisimavaat, pisimasoq atorfinitsitsisarnermut kinguneqarsimanngitsoq, suleriaatsilli sulisunut erseqqissaassutigineqarsimasut:
- Aningaasaqarnermut pisortap aningaasaqarnermut immikkoortortami sulisunut tamanut malittarisassat nassiussimavai, tassani allassimalluni akiligassiissutitut nassiunneqarsimasut, eqqortuuppata eqqortuunngippataluunniit E-mailikkut suliarinngisaannassagaat, Nukissiorfiit ataatsimiititaliamut allapput.
Suliffeqarfiup peqquserluuteqartoqarsimanera Nukissiorfinnut ilisimatitsissutigisimavaa, aamma Internetsikkut isumannaatsuunissamik paasititsiniaasarneq aallarteqqinneqarniartoq oqaatigalugu.
Nukissiorfiit aamma 2021-mi ingerlalluarpallaarsimanngillat, tassa ingerlatseqatigiiffiup aningaasaqarnerat ingerlalluarpallaannginnera saqqummiunneqarsimavoq, 2020-milu 153 millioner koruuninik amigartooruteqarsimasoq allassimalluni.