Nukissiorfiit akitsuutinik qaffasipallaartunik innuttaasunut inerteqqutaasumik akileeqqusisimapput
Nunatta Eqqartuussiviani Nukissiorfiit innuttaasut ingerlatseqatigiiffimmut akiligassaminnik piffissaagallartillugu akiliisimanngitsut akitsuutinik qaffasippallaartunik akileeqqusisimasut, suliareqqitassanngortissimasai qulit aalajangiiffigineqarsimapput.
Nukissiorfiit innuttaasut ingerlatseqatigiiffimmut akiligassallit akitsuutinik ernianillu akiligassamik qaavatigut akiliisinniarlugit suliassaatiminik qulinik siullermik eqqartuussivimmi tullianillu Nunatta Eqqartuussiviani ilalerneqarnissartik anguniarlugu suliaqartitsisiapput. Ilalerneqarsimanngillalli.
Kingusinaartumik akiliuteqarnermi il. il. ernialersuinissaq pillugu nalunaarut
§1 Imm. 3. Inatsit atuutissanngilaq, inatsit naapertorlugu allamik aalajangiisoqarsimappat imaluunniit allamik isumaqatigiissuteqartoqarsimappat, taammaattoq tak. §§ 7, 9 a aamma 9 b
§ 9b Imm. 2. Akileeqqusilluni allagakkat annerpaamik 100 kr.-nik akitsuuserneqarnissaat piumasarineqarsinnaavoq, taamaattoq pineqartumut aalajangersimasumut atatillugu amerlanerpaamik pingasoriarluni allagaqartoqarsinnaavoq. Akiligassalik piffissami aalajangersimasumi akiligassaminik akiliisimanngippat, imm. 1-imi qanorluunniit allassimasoqaraluarpat, piffissami pineqartumi akiligassaanut atatillugu pingasorialuni allaffigineqarnerminut akileeqqusinermut akitsuummik pingasoriarluni piumaffigineqarsinnaavoq. Akileeqqusilluni allakkat ullut qulit allortarlugit nassiunneqartut kisimik akitsuuserneqarsinnaapput.
Eqqartuussivimmi Nunattalu Eqqartuussiviani aalajangerneqarpoq, Kingusinaartumik akiliuteqarnermi ernialersuinissaq pillugu Kalaallit Nunaannut Nalunaarummi aalajangersagaavoq, pingasoriarluni akileeqqusilluni allagaqarnerit sinnerlugit 100 koruuninik Nukissiorfiit akileeqqusinissamut tunngavissaqanngitsut.
Qaffasippallaanik akitsuusiinerup saniatigut ernialersuilernissamut ulluliunneaqarsimasoq eqqortuunngilaq, tamatumami kinguneranik akiligassat qaffasippallaamik ernialersorneqarsimapput.
Nammineq piumasaqaasiat atuutinngitsut
Eqqartuussivimmi Nukissorfiit qaffasissunik ernialiisoqarlunilu akitsuusiisoqarnissaanik piumasaqarsimanerat ilalerneqanngikkaluartoq, suliffeqarfimmit suliat Nunatta Eqqartuussiviani suliareqqitassanngortinneqarsinnaasut isumaqartoqarsimavoq.
Tassa innuttaasut qulit eqqartuussivimmi suliassanngortitsisimasut eqqartuussinerit marluk ingerlattariaqarsimavaat, Nukissiorfiit akiligassanut atatillugit amerlavallaanik akileeqqusisimanerat aalajangiiffigitinnagu.
Nukissiorfiit sulianut atatillugit tunngavilersuutigisimavaat, nalunaarummi paragraffi ataaseq malillugu sullitaminnut "allatut isumaqatigiissuteqarsimaneq". Nunattali Eqqartuussiviani Nukissiorfiit taamatut pisinnaatitaaffeqanngitsut isumaqartoqarpoq.
Sermitsiaq.AG -mit Nukissiorfinni nukissiuuteqarnermut pisortaq nutaaq attaveqarfigineqarsimavoq, taannalu suliaq pillugu akissutissaqaleriaruni nalunaaruteqarniarluni neriorsuisimavoq.