Nuna qeriuaannartoq silallu allanngoriartornera pillugit meeqqanut titartaganngorlugu oqaluttualiaq
Ullutsini sammineqarnerpaat unammillernarnerpaallu ilaat pillugit titartaganngorlugu oqaluttualiaq meeqqat atuarfiini ilinniartitsinermut atorneqartassaaq.
Nuna qeriuaannartoq silallu allanngoriartornera pillugit titartaganngorlugu oqaluttualiaq qaammatip matuma ingerlanerani meeqqat atuarfiinut tamanut nassiussuunneqassaaq.
Asiaq
ASIAQ Greenland Survey Kalaallit Nunaanni avatangiisit uumassuseqanngitsut tunngavigalugit misissueqqaarlunilu ilisimatusartarpoq.
Paasissutissaativut ukunannga pissarsiarisarpavut; illoqarfiit nunaqarfiillu kiisalu nunaannap assiliorneri, imeqarfiit uuttortarneri, silamik nakkutiginninneq, nunamik misissuinerit sanaartukkallu nunataasa uuttortarneri.
Asiaq 100 % -imik Namminersorlutik Oqartussanit pigineqarpoq, ukiullu 60-it sinnerlugit Kalaallit Nunaanni tamarmi misissueqqaarnermik suliaqartarluni. Pissarsiffik: Asiaq
Frozen-Ground Cartoons taaguutaavoq titartakkatut oqaluttualiamut, taanna siullermeersumik 2017-imi saqqummersinneqarpoq aamma danskisut kalaallisullu nutserneqarsimavoq, ilisimatusarfik Asiaq tusagassiorfinnut nalunaaruteqarnermi allappoq.
- Neriuutigaarput pinngortitalerinermi atuartitsisut atuartitsinerminni atuakkat atorsinnaagaat. Neriuutigalugu atuartut, ilinniartitsisut angajoqqaallu atuarnerminni pissanganartunik nutaanik paasissutissanik pissarsiumaartut. Immaqa siunissami silaannaap pissusaanik ilisimatusarusuttuaqqat aamma soqutigininnilersinneqarsinnaapput, Kerstin Krøier Rasmussen Asiameersoq taama oqaaseqarpoq.
Grønlandsk vinkel
Suliniut meeqqanut Kalaallit Nunaanni najugalinnut naleqqunnerulersinniarlugu Asiaq Greenland Ecosystem Monitoring suleqatigalugu quppernernik sisamanik ilasisimavoq. Quppernerni ilassutigineqartuni Kalaallit Nunaanni qeriuaannartoq, silaannaap pissusaa ilisimatusarnerlu titartaganngorlugu oqaluttualiarineqarsimasunut ilanngunneqarsimapput.
- Taamaaliortoqarnissaanut Kerstin Krøier Rasmussen aammalu Kirsty Langley Asiameersut titartaasartoq Canadamiu Noémie Ross suleqatigisimavaat. Taakkuullutillu inuttaasunik pingasunik pilersitsisimapput, taakkualu atorlugit Kalaallit Nunaanni qeriuaannartoq pillugu nassuiaasimapput kiisalu ilisimatuussutsikkut ilisimasat pisariinnerit paasiuminartunngortillugillu quianalaartunngorlugit saqqummiunneqarsimapput, tusagassiorfinnut nalunaarummi allassimavoq.
Atuakkat titartakkat atorlugit oqaluttualiarineqarsimasut atuarfinnut nassiussuunneqarput,
atuakkalli nunatta atuagaateqarfiani aamma nassaarineqarsinnaapput
www.frozengroundcartoon.com -ilu aqqutigalugu digitaliusut aamma
pissarsiarineqarsinnaallutik.
