Nunagisamit ungaseqisumi juullisiorneq
Ilisimatusarfimmiilinniariartut marlukNuummi juullisiortussat.
Ilisimaneqartutut juulli ilaqutariit nalliuttorsiorfigisarpaat, nalliuttunili inuit tamarmik angerlarneq ajorput. Taakku ilaat marluk ukioq manna sumiiffimmi nutaami juullisiortussat tassaapput Frida Dohmann aamma Fillip Puljiz marluullutik Ilisimatusarfimmi ilinniartut.
Ukiut tamaasa Ilisimatusarfiup nunarsuarmit tamarmit ilinniartut tikilluaqqusarpai, nammineq ilinniartuutini aamma allamukartillugit. Ilisimatusarfik nalunaarpoq ukioq manna kalaallinit ilinniartunit nunani allani juullisiortoqassanngitsoq.
Frida Dohmann 25-nik ukiulik aggustimili Nuummiissimavoq, januaarimi Københavnimut utertussaalluni. Juullikkunni angajoqqaani qatanngutinilu angutit marluk tikeraartigissavai, taamaalilluni angerlarsimaffippalaartumik juullisiussalluni naak angerlarsimaffimminut ungasikkaluarluni.
- Takutitassarpassuaqarpunga. Soorunami Ilisimatusarfik pinngortitarlu, sila ajussanngippat, angallammillu angalaassaagut illoqarfimmilu angalaarluta. Tusarsimavara juulimaaq qulimiguulimmik tikittartoq, tamannalu alutornassaaq. Aamma naalagiassaagut. Allaanerullunilu nuannissaqaaq, aammali Danmarkimisut ittoqarpoq, Frida Dohmann oqarpoq.
Ilaquttat ilaginagit juulli
Kroatiamiu 24-nik ukiulik Flillip Puljiz ilaqutaqarani juullisiussaaq, ineeqqami najugaqatinilu juullisiussalluni immaqalu ilinniartut allat juullisiorfissaqanngitsut. Tamatuma saniatigut juullikkunni ullut ilaat Nuummi oqaluffimmi kajumissutsiminik sulinermut atussavai.
- Qilanaareqaara, inuuninnilu apisimasumi juullisiornerma aapparissavaa, nalunngilaralu juulimaaq qulimiguulimmik tikissasoq, tamannalu takorusuppara, Fillip Puljiz nalinginnaasumik Sverigemi ilinniartuusoq oqarpoq.
Nunaani Kroatiami juullisiortarneq maani Kalaallit Nunaanniit allaaneroqaaq. Aatsaat decembarip 24-ani Fillip Puljizip ilaqutaasalu illu orpillu juullimut pinnersartarpaat. Juullerujussuarmilu nunami uumasunit neqitorneq ajorput. Aalisagartortarput, annermik aalisakkanik panertunik, naatsiianik aalisakkamillu qalatamik. Kinguleqqiutitut naqittakkamik kaagisortarput, unnuallu qeqqani Fillip Puljiz ilaqutaalu naalagiartarput, kingornalu nerisarlutik tassaasunik fransk salat, puulukip neqaa pujuugaq, immussuaq kaagilu.
- Aqaguani 25-ani aamma naalagiartarpugut, taavalu ’Home Alone’ isiginnaartarparput, taamaaliorneq Kroatiami ileqquummat atugaasupilussuaq. Filmit siulliit juullimut tunngasut isiginnaaqqaartarpavut kingulliillu ukiortaami, Fillip Puljiz oqaluttuarpoq.
Ilinniagaqarluartoq
Ukiortaap kingorna ilinniariartut marluk angerlarunik ilisimasarpassuarnik nassassapput. Frida Dohmannip nalinginnaasumik Roskilde Universitetimi ilinniartup Nørrebromilu najugaqartup maani kulturi eqqissisimasoq iluaraa, angerlarnissanilu ernumagilaarpaa.
- Matumik ammasumik kultureqarneq maani misigisara nuannareqaara, angerlarnissaralu siooragilaarlugu. Maani kikkut tamarmik tikilluaqqusaapput, ilaquttallu akornanniikkaanni imaluunniit ikinngutit, inuit oqartarput ’ takkutiinnarumaarputit’. Inuk akunnerup aappaata affaanaanni ilisarisimasara illoqarfimmi naapippara, ilaquttaminilu juullisiornissannik qaaqqullunga. Taama matumik ammasumik kultureqarneq angerlaakkusuppara, Danmarkimilu inuuninni atorlugu, Frida Dohmann oqarpoq.
Fillip Puljiz Sverigemi, Kroatiami Hollandimilu ilinniarsimavoq, maannalu Kalaallit Nunaanni, taamaalilluni nuna nutaaq qangali tikeraarusuttarsimasani ilisimasaqarfigilerlugu.
- Paarlaateqatigiinnermi peqataasussanngorama nuna uannut takornartaanerpaaq toqqarsimavara. Siusinnerusukkut Kalaallit Nunaannut takornariarusuttarsimavunga, maangali angalaneq akisoqaaq, taamaattumik tapiissutisigama periarfissaq ilassilluarpara, maanngarnissannut periarfissatuaasorigakku.
Kroatiami ikinnguterpassuisa ilisarisimasaasalu naluaalluunniit Kalaallit Nunaanni inoqartoq, Fillip Puljiz oqaluttuarpoq.
- Aperisarput, ’Sermiinnaannginnami?’, ’inoqarami?’ ’Ilisimatusarfeqarami?’ Aamma nunap assinga misissorpara eqqarsarlunga ’Kakkaak sermeqarmat.’ Maanna ilisimalerpara inuit nunagigaat, Kalaallit Nunaat, nunasiaateqarsimanerlu kingunerilu ilikkagaqarfigisimaqalugit, tamakkumi Kalaallit Nunaannut aallannginninni ilisimasaqarfigisorsuunngilakka.
