Nunami tamarmi atuartut tamarmik maanna iPadeqalerput
Suliniut Kivitsisa aqqutigalugu iPadinik agguaassinermi kingullerni Kommuneqarfik Sermersuumit Ejnar Mikkelsenila Alivarpiani atuartunut iPadit kingulliit agguanneqarput. Atuarfimmilu pisortamit tamanna nuannaarutigineqarpoq.
2. klassini ilinniartitsisut atuartullu tamarmik maanna iPadeqalerput.
Suliniut Kivitsisa aqqutigalugu nunami tamarmi iPadeqalersitsisoqarpoq.
Ejnar Mikkelsenila Alivarpia ilanngullugu agguaasisoqarmat Kommuneqarfik Sermersuumi iPadit 3.400-nik ikinnerunngitsut agguaanneqarsimalerput. Tamannalu kaagillernikkut nalliussineqarluni.
Atuarfimmi pisortaq Jonathan Petersen atuartut ilinniartitsisullu sinnerlugit nuannaarpoq.
- Nuannaarutigaara iPadeqalernerat, ilinniartitsinermimi atorneqarsinnaasunik programmerpassuaqarpoq.
Jonathan Petersenip nassuiaatigaa, atuarfimmi attaveqaatit ajoraluartumik arriitsuararsuusut, iPadilli qujanartumik internet-imut attaveqanngikkaluarluni atorneqarsinnaasut oqaatigalugu. Assut nutaaliaapput, taanna oqarpoq.
Ilinniartitsisut atuartullu piginnasaqarnerulersissagair
Kommuneqarfik Sermersuumit ilisimatitsissutigineqarpoq, ilinniartitsinermi iPadit atorneqalernerat ilinniartitsisunut aamma piumasaqaateqarfiusimasoq. Taamaattumik ilinniartitsisut, ulluinnarni iPadip atuartitsiffinni atorneqartalernissaanut piareersarniarlutik, piginnaanngorsarluni pikkorissarnernik assigiinngitsunik ingerlatsisimasut.
Taanna ingerlatsineq, takkulluni peqataanikkut internettikkullu ingerlaavartumik ingerlanneqassaaq, taamaalillutik ilinniartitsisut atuartitsinerminni atortumik nutaamik atortoqarlutik ingerlatsinissaminnut pitsaanerpaamik piareersarneqarniassammata.
iPadeqartitsinermi siunertarineqarpoq, atuartut ilisimasanik katersinissamut, nutaanik ilisimasaqalernissamut ilisimasanillu avitseqateqartarnissamut periarfissaqartinneqarnissaat, taamaalillutik nunami maani nunanilu allani atuartunik suleqateqarsinnaanngussallutik - aamma ungasissumiit ilinniartitsissutitut atorneqarsinnaavoq.
Atualerlaat siunissami aamma pisaassapput, aatsaalli atualernermiit qaammatip ataatsip ingerlareernerani, taamaalillutik atuarneq qanoq ingerlanneqartassanersoq ilisimasaqarfigileqqaarniassammassuk, kommunimit oqaatigineqarpoq.