Nunani Avannarlerni nutaamik ataatsimoorussamik puisit pillugit politikki
Nunani avannarlerni aalisarnermut, nunamik atuinermut, inuussutissalerinermut aamma orpippassuaqarnermut ministerit ulloq 28. juni 2008-imi ukiumoortumik aasaanerani ataatsimiipput Växjö-mi Sverigimiitumi.
Ataatsimiinnermi tassani ministerinit ilaatigut akuersissutigineqarpoq Østersømi Atlantikullu Avannaani puisinik iluaquteqarneq piujuaannartitsinerlu pillugit nalunaarut.
Ministerit nalunaarutaat nunani tamalaani puisit inuiaqatigiillu pillugit ataatsimeersuarnermit nangitsineruvoq, taanna Finlandimi oktober 2007-imi ingerlanneqartoq. Taamanimiilli erseqqissaatigineqarpoq, puiseqassutsikkut piujuaannartitsinermi iluaquteqarnermilu oqimaaqatigiittoqarnera aalajangiisuusumik pingaaruteqartuusoq.
Maannakkut akuersissutaasoq Växjö-mi nalunaarut ”Puisi inuiaqatigiillu” piffissaq eqqorlugu saqqummerpoq, tassami EU-Kommissionip anguniagai eqqussuinissamik inerteqquteqarnerup atortuulersinneqarnissaanik imalik Aalisarnermut, Piniarnermut Nunalerinermullu Naalakkersuisumut Finn Karlsen-imut annertuumik ernumalersitsimmat: ”Nunani avannarlerni ministerit puisinik iluaqutiginninneq piujuaannartitsinerlu pillugit ataatsimoorneranni nunarsuarmioqataasunut pingaarutilimmik kalerriiniarneruvoq. Taamaasiornikkut takutissinnaavarput, uagut Kalaallit Nunaanni kisimiilluta isiginninnginnatta, puisit aamma uumasuusut iluaqutigineqartariaqartut, taamaasiorneq piujuaannartitsinermik tunngaveqarluni ingerlanneqarpat. Taamaattumik assorsuaq nuannaarutigaara puisinniarnermut nunani avannarlermiut ataatsimoorussamik tapersersuinerat.”