Nunani avannarlerni qaleralik misissuiffigineqalersoq
Norge, Island, Canada, Savalimmiut aamma Kalaallit Nunaat suleqatigiinneratigut qaleralik misissuiffigineqassaaq
Qalerallit sumiiffimmi ataatsimi suffisarfeqarpat? Suli suffisinnaannginnerminni akuliuttarpat imaluunniit suffisinnaanngoreerlutik nerisassarsiornerminni akuliuttarpat? Qanoq annertutigisumik allatigut akuliuttarpat?
Apeqqutit taakku akiniarlugit Norge, Island, Canada, Savalimmiut aamma Kalaallit Nunaat suleqatigiillutik paasiniarneqassapput.
- Qaleralik Nunatta kangiata avataani tassa, Islandip Savalimmiullu aamma imartaaniittoq qaleralittut ataatsimik aallaveqartutut isiginiarneqartarpoq qaleraleqarfittullu ataatsitut aqutsivigineqarluni, taamaattumillu imartaq nunat taakkua akornanniittoq qaleqarfittut ataatsitut aamma siunnersuiffigineqartarpoq. Uumasulli timaaniittut kingornuttakkat misissuiffigineqarnerisigut nalunaaqutsikkallu pisareqqinneqartarnerisigut pasitsattoqarpoq Nunatta Kangiani qalerallit Islandip Savalimmiullu eqqaanniittuninngarnit allaanerusut, Pinngortitaleriffik allappoq.
Polar Seafood Royal Greenlandilu
Taamaattumillu sukumiinerusumik misissuisoqarnissaa pisariaqalersimavoq, qalerallit Nunatta Kangianiittut immikkuullarissuusut qularnaatsumik paaserusullugu taamaattumillu immikkut aqutsivigineqartariaqarnerat naqissuserniarlugu – tassa atlantikumeersunut ilanngunnagit immikkut aqutsivigineqarnissaat uppernarsillugu aalajangiiffigineqartariaqarsorineqarpoq.
- Polar Seafood Royal Greenlandilu atsioqatigalugit isumaqatigiissuteqarfigereernerisigut Pinngortitaleriffik suliniummut peqataassaaq, kilisaataatillit uumasorsiooq ph.d-tut allagartalik (postdoc) ukiuni marlunni akissarsialerlugu Pinngortitaleriffimmi sulisissavaat, nalunaarutigineqarpoq.
Nunat avannarliit
Daniel Estévez-Barcia suliarinnittussatut atorfinitsinneqarpoq, statistikit aallaavigalugit nalilersuisinnaanera ingammillu timip kingorngussartaanik misissuisinnaanera pissutigalugu, taamaalillunilu qaleraleqassutsip misissuiffigineqarnissaanut qitiusumik piumasaqaatit isumagisinnaammagit.
- Nunatta kitaani kangiatalu qaleraleqassusia pingaarnertut misissuiffigissavai, aammali qaleralinnut atlantikup avannaaniittunut qanoq attaveqartigisarnerat ataatsimoorfeqartigisarnerallu paasiniassavai. Islandimi, Norgemi, Danmarkimilu imaani ilisimatusarnermik ingerlatsiviit qanimut suleqatigalugit suliaq ingerlanneqartussaavoq, taakkua tamarmik misissuisarfeqarlutillu immikkut ilisimasalinnik peqarmata, nalunaarutigineqarpoq.