Nunanut allanut niueqateqarneq annertusariartoq
Avammut nioqqutit eqqussukkallu tamarmik qaffariaateqarsimapput. Niuernermi oqimaaqatigiissummi amigartoorut annertuseriarpoq.
Ukioq kingulleq avammut nioqqutit ukiup siulianut sanillersuullugu 4,8 procentimik qaffariaateqarpoq. Eqqussukkallu qaffasinnermik qaffariaateqarsimavoq, tassa 6,8 procentimik. Tamanna Naatsorsueqqissaartarfiup kisitsisaataasa nutaat takutippaat.
Niuernermi oqimaaqatigiissummi amigartoorut 1,08 milliarder koruuniniit 1,24 milliarder koruuninut qaffariaateqarsimavoq.
2018-imi avammut nioqqutit 4,06 milliarder koruuninut qaffariarpoq. Qalerallit avammut nioqqutigineqarnerisa naligi qaffariaateqarnerpaapput, aningaasanngorlugit 257 millioner koruunit procentinngorlugulu 30,8.
Eqqussuinermut aningaasartuutit 2018-imi 5,30 milliarder koruunipput. Annertuserianermi pissutaanerpaapput maskiinat assartuutillu eqqussuunneqartut nalingat 226 mio. koruuninik (15,3 procentimik.) annertuseriarsimammat.