Nunap assingi nutaat saqqummiunneqassapput

Namminersorlutik Oqartussat aamma Qallunaat Nunaanni Styrelse for Dataforsyning og Effektivisering Kalaallit Nunaanni nunap assinginik nutarterillutik 2015-imili suleqatigiilerput. Suliaq maanna naammassilluinnalerpoq, nunallu assingi nutartikkat 2022-p ingerlanerani atulersinneqassapput.

Namminersorlutik Oqartussat tusagassiorfinnut taama nalunaaruteqarput.

Namminersorlutik Oqartussat nunap assinginik suliat assigiinngitsut soqutiginnittunut Katuami 3. marts nal. 15-17.00 saqqummiutissavaat.

Suliat assigiinngitsut

Kalaallit Nunaanni nunap assingi maanna atorneqartut timmisartumiit 1937-mi aamma 1970-ikkunni timmisartumiit assilisat aallaavigalugit suliaapput.

Nunap assinginik suliaqarneq 2015-imi aallartinneqarmat A.P. Møller Fonden sulinissamut 15 milliuunit koruuninik aningaasaliivoq.

Nunap assinginik suliat ukuupput:

• Nuna tamakkerlugu qaammataasiakkut assilisanik nittartakkakkut sullissivik, maanna atorneqarsinnaalereersoq
• Nunap assinga angissutsimut 1:50.000 naleqqiussaq nunap assinginut G250-inut taartaasussaq
• GIS-applikationinut tunuliaqutatut nunap assinga assersuutigalugu pisortat allaffeqarfiini pilersaarusiornermilu atorneqarsinnaasoq
• Paasissutissat assigiinngitsut, ilaatigut pukkinnerit portunerillu ersersillugit assilisat, qatsissutsinut ilusiliaq aamma annertussutsinik paasissutissat

Nunap assingi pillugit paasissutissat Asiap nittartagaani atuarsinnaavatit.

- Nunap assingi pitsaanerusut tamatta pitsaanerusunik periarfissippaatigut. Inuppassuit nunap sannai pillugit paasissutissat arlaatigut atortarpaat. Kommunimi sulisunit takornariartitsisartunut ilaqutariillu aavartut nunap assinginik nutaanik iluaquteqarsinnaapput, Aningaasaqarnermut, Aatsitassanut, Inatsisit atuutsinneqarnerannut Naligiissitaanermullu Naalakkersuisoq Naaja H. Nathanielsen oqarpoq.

Nunap assingi paasissutissallu nutaat SDFE-mi Namminersorlutik Oqartussanit, Asiarmit, Forsvarsministeriets Materiel- og Indkøbsstyrelsemit kiisalu A.P. Møller og Hustru Chastine Mc-Kinney Møllers Fond til almene Formaalimit suliarineqarput.