Nunaqarfiit pillugit ataatsimeersuartoqaqqissanngilaq
Naalakkersuisut nunaqarfiit pillugit ataatsimeersuarnissamik pilersaaruteqanngillat. Nunap immikkoortortaani sisamani nunaqarfiit illoqarfinnillu ineriartortitsineq pilersaarusiorfigineqassaaq.
Aleqa Hammondip apeqqutaannut Nunamut imminernut naalakkersuisup Anthon Frederiksenip akissutaani tamanna erserpoq.
Siumup siulittaasuata apeqqutigaa pilersaarutaanersoq nunaqarfiit suleqatigiinnerisa nukittorsarneqarnissaat, naalakkersuisullu nunaqarfiit pillugit ataatsimeersuartitsinissamik pilersaaruteqarnersut tamanna pitsaasumik misilittagaqarfigineqarmat.
- Nunaqarfiit nunap ineriartorteqqinneqarneranut ilaatinneqartuassapput nunap immikkoortortaani tamani (aamma nunaqarfinni) piginnaasanik ineriartortitseqqiinissaq anguniarlugu taassuma saniatigut sumiiffiit immikkuullarissusaat pigiinnartariaqarpoq, Anthon Frederiksen allappoq.
Pilersaarutigineqarpoq suliffeqarnikkut aamma ineriartortitsinissamik politikkeqalernissaq nunap immikkoortortaasa assigiinngissutaat tunngavigalugit.
- Nunamik immikkoortunngorlugu agguinermi aamma ersersinneqarlunilu takuneqarsinnaavoq sumiiffinni assigiinngitsunik pisariaqartitsisoqartoq aammalu assigiinngitsunik ineriartornissamut periarfissaqartoq - tamanna nunaqarfippassuarni aamma atuuppoq.
Naalakkersuisut nunaqarfiit ataasiakkaat ineriartoqqiffissaat misissussavaat qanorlu isillutik illoqarfimmut anginermut qanitsigisaminnik suleqateqarsinnaanersut. Eqqortumik oqaatigalugu nunaqarfiit aningaasaqarnerat misissorneqassaaq siunissamilu periarfissaat aamma misissorneqassallutik.
- Pilersaarummi Naalakkersuisut susassaqartut tamaasa peqataatinniarpaat soorlu nunaqarfiit suleqatigiiffiat KANUNUPE aammalu kommunit kattuffiat KANUKOKA.
Anthon Frederiksen paasissutissiivoq Nunamut imminernut naalakkersuisoqarfiup suliffeqarnermut naalakkersuisoqarfik peqatigalugu pilersaarummik kingusinnerpaamik 2010-mi saqqummiussisoqassasoq.