Nunaqarfiit: Piorsarsimassutsikkut kingornussarsiat akisuut siunissamiluunniit periarfissat?

Aamma kalaallit nunaqarfinniit illoqarfinnut nutserarput. Nunaqarfiit amerlanersaat inuerukkiartorput ullumikkullu ikittuinnaat inoqassutsimikkut aningaasaqarnikkullu imminnut napatissinnaallutik. Nunaqarfiit ajuleriartuaarnerat inuiaqatigiinnullu aningaasarpassuarnik akeqarnerat isiginnaarusaaginnassavarput imaluunniit eqeersimaarluta akuliussinnaavugut nunaqarfinnilu inuuneq siunissami Kalaallit Nunaata periarfissaatut piujuartussanngortillugu?

Ineriartorneq ukiuni kingullerni qulinisut ingerlaannarpat nunaqarfiit ukiut 50-it qaangiuppata inuerulluinnarsimassapput. Taamalu pisoqarnissaata tungaanut avinngarussimasuni pisortat kiffartuussinerannut inuiaqatigiinnut aningaasartuutaarujussuarsimassallutik. Kalaallinut 57.000-iinnarnut Europap kitaanisut annertussusilimmut siammarsimasunut atugarissaarnerup attatiinnarnissaa inooqatigiinnikkut aningaasaqarnikkulluunniit nappanneqarsinnaanngilaq. Innuttaasut eqitertinnerat aatsitassarsiornermisulli annertutigisumik Kalaallit Nunaata iluanaarutigisinnaassagunaraa misissuinernit takutinneqarpoq. Kisianni nunaqarfiit piorsarsimassutsikkut pingaarutilerujussuupput Kalaallit Nunaallu qangaanerusumut tunngasoq pillugu oqaluttuarisaanermut ilaallutik.

Apeqqutaavorli qangatut nunassittarnerup pissusaa ataavartinneqarsinnaanersoq inuiaqatigiinn suliassat nukinginnartut soorlu ilinniartitaaneq inuussutissarsiutinillu ineriartortitsineq pilliutiginngikkaluarlugit? Siunissami illoqarfinnut sanilliullugu kajungernartunik allanik periarfissaqarnissaa aamma qulakkeersinnaavarput: Nunaqarfimmik imminut napatittumik ingerlalluartumillu? Kalaallit piorsarsimassusaannik siumut isigisumik attassisumik. Sumiiffimmik qanilaassuseq ataqatigiinerlu eqqarsaatigallugit kalaallit ileqqutoqaannik toqqammaveqartumik, pinngortitap inuunermu qanilluinnartumik qitiusumillu ilaatinneqarfigisaanik. Nunaqarfiit ingerlalluannginnerpaat suliniuteqarluta matoorassavavut, nunaqarfiilli siuariartornissamut atugarissaarnissamullu pitsaanerpaamik tunngavissallit ineriartortillugit?

Qanoq ililluni ima ajornakusoortigisumik aalajangiisoqarsinnaava politikerit arlaannaasaluunniit siuttuunissartik qunugalugu? Najugaqarfiit eqitertinneqarnissaat isumatusaarnerusoq misissuinernit tamanit takutinneqarpoq, kisianni ilaqutariinnik piumanngitsunik angerlarsimaffiinit najugarisaannillu peersitsinissaq kimilluunniit kissaatigineqartanngilaq. Nunassittarnitsinnut atatillugu aalajangiinerit soorunami innuttaasut tapersersuilluarnerannik tunngaveqartariaqarput. Paasissutissinneqarsimanerli tunngavigalugu aalajangiisoqartariaqarpoq tamatumanilu innuttaasut amerlasuut peqataaffigisaannik oqalliseqqaarnissaq pisariaqarpoq.