Nunaqarfimmi aqutsisut IA-miit aninngitsut
IA tunuliaqutaralugu Kommune Qeqertalimmi nunaqarfimmi aqutsisuni ilaasortat partiimik tatiginnipput. Kommunalbestyresemi ilaasortat marluk oqariartuutaat illuatungilerlugu ingerlatsinermi siulittaasup tullia taama nalunaaruteqarpoq.
Kommune Qeqertalimmi kommunalbestyrelsemi ilaasortat marluk aamma nunaqarfinni aqutsisuni ilaasortat pingasut sisamanngormat nalunaaruteqarput IA-miit anillutik, Siumumilu ilaasortanngorlutik. Taama aalajangernermut kommunip aqunneqarnera isornartorsiorneqarpoq.
Inuit Ataqatigiinni aaqqissuussaanermi siulittaasup tullia, Agathe Fontain (IA) tallimanngornermi nalunaaruteqarpoq, Kommune Qeqertalimmi nalunaarut ilaatigut eqqunngitsortaqartoq. Tassa nunaqarfimmi aqutsisut IA-mi suli ilaasortaasut.
- Inuit Ataqatigiinnut tatiginninnertik attappaat, kommunerisaminnilu nunaqarfiit pillugit sulianut pitsanngorsaanissamut peqataanissartik kissaatigalugu. Kommune Qeqertalimmi Inuit Ataqatigiit kommunegruppe nunaqarfiit sullinneqarnerinut pitsanngorsaaqataanissamut piareersimapput, Agathe Fontain nalunaaruteqarpoq.
Paatsoortoqarsimasoq
Akunnaameersoq Gerth Nielsen, Ikamiuneersoq Ole Johansen aamma Niaqornaarsunneersoq Hans Jeremiassen nunaqarfinni aqutsisuni ilaasortaasut suli IA-mik tunuliaqutaqarput.
Gerth Nielsen Sermitsiaq.AG-mut mnassuiaavoq paatsooqatigiittoqarsimasoq, anisutullu nalunaarutigineqarnini paasigamiuk qullersaqarfimmut nammineq saaffiginnissimalluni nassuiaalluni.
- Paatsuuininniit tamanna pivoq. Tusagassiorfinnut nalunaarummi oqariartuutit ilai paatsoorpakka, aamma partiimiit aninissara kissaatiginngilara. Partiimiit anissaguma, partiimullu allamut nuussaguma, nammineq tamanna uanga suliariumaarpara, Gerth Nielsen Sermitsiaq.AG-mut oqarpoq.
Nunaqarfinnut attaveqarnerit
Taassuma nassuerutigaa Frantz Lundbladip aamma Karl Thue Nathanielsenip IA-mit anillutik Siumumut nuunnerminni tunngavilersuutaasa ilaat isumaqatigalugit.
Politikerit marluk Siumumut nuunnerminni ilaatigut nunaqarfinnut attaveqarnerup sullissinerullu pitsaannginnerulersimanera tunngavilersuutigaat.
- Nunaqarfinnut tunngasunik suliaqartumik, nunaqarfinnullu aqutsisunut attaveqaataasumik aalajangersimasumik pisariaqartitsivugut. Kommunimut saaffiginninnermi saaffissanut tulleriiaannut nuutsinneqaqattaartuarnermut tunngatillugu isornartorsiuineq ilisarisinnaalluarpara. Kommunitsinni attaveqarneq pitsaanerulertariaqarpoq, tamanna sulissutigissuarput, Gerth Nielsen oqarpoq.
Taanna ilisimatitsivoq nunaqarfinniit allaniit innuttaasut aqutsisunilu sulisut isumaqataallutik aamma nalunaarsimasut.