Nunaqarfimmiut: Tupassimaqaagut
Nunaqarfimmiut ilaqutaasut ilagaat. Sapinngisaminnik tapersersorniarsaraat - toqutsinerit unnuaq pipput, Nutaarmiuni najugalik oqaluttuarpoq
Avannaani nunaqarfeeqqami Nutaarmiuni akunnerni makkunani tupassimasoqarlunilu upperinninngitsoqarpoq, ullaaq siusissukkut inuit pingasut toqutaasimasut marlullu inuunerminnik ulorianartorsiorlutik ikilerterujussuarsimasut nassaarineqarmata.
Nunaqarfimmiut alianartumik nalunaarfigineqarlutik iterput.
- Tupannaqaaq tamattalu aliasuppugut. Nunaqarfimmi maani tamatta soorunami nalunngilarput kikkut ajortuliorfigineqarsimanersut. Pisimasoq tupannartoq pissutigalugu ullumikkut friissamaaraluarpunga, suliartuinnarpungali politiit qanittukkut tikittut ikioriartorlugit, arnaq nunaqarfimmiu Sermitsiaq.AG-mut oqaluttuarpoq.
Atuaruk: "Nutaarmiut: Toqutsisoq tigusarineqarpoq"
Atuaruk: "Toqutsineq uissuummisitsivoq"
Atuaruk: "Nutaarmiuni toqutaasut pingasut"
Taanna oqaluttuarpoq toqutsinerit unnuaq pisimasut. Arnap tupassimasup oqaaseqarpallaarusunngitsullu toqutsisuusimasorisaq oqaaseqarfigiumanngilaa ajortuliornermulluunniit suna pissutaanersoq isumaliutigiumanagu.
Ullup qeqqata siuninngua politiit nalunaarput nunaqarfimmi inuk ataaseq tigusarisimallugu. Pisimasoq alianartoq pillugu politiit manna tikillugu annikitsuinnarmik paasissutissiipput. Nalunaarut takkutiinnavissoq helikopteri politiinik sisamanik peqqissaasumillu issimasulik Nutaarmiunut aallartinneqarpoq, taannalu Upernavimmit 90 kilometerit missaannik avannarpasitsigisumiippoq.
Siullermik politiit nunaqarfik qulakkeerniarsimavaat ajortuliortorlu sakkoqarsimappat sakkuiarniarlugu. Nutaarmiuni kommunefogedeqanngilaq, taamaattumik politiit siumut ilisimasimanngilaat suna orninnerlugu.
Nunaqarfimmiut sapinngisartik tamaat toqutaasut ilaqutaat isumassorniarsaraat.