Ussassaarut
Nunaqarfinni eqqakkanik ammaannartumik ikuallaasarneq unitsinneqartoq
Avannaata Kommuniani nunaqarfinni eqqakkanik ammaannartumik ikuallaasarneq unitsinneqarallarpoq. Kommunillu ikuallaasarnermik, toqunartunik inuunermut ulorianaatilinik pilersitsisinnaasumik, ingerlatseqqilersinnaanerata paasinarsinissaanut qaammat ataaseq sinnerlugu ingerlasinnaavoq.
Ussassaarut
Ussassaarut
Ussassaarut
Avannaata Kommuniani eqqakkanik ammaannartumik ikuallaasarnera, toqunartunik dioxinitalinnik pilersitsisinnaanini pissutigalugu ajornartorsiutaasoq, unitsinneqarallarpoq, piffissaq immikkut akuersissuteqarfiusoq qaammatinik pingasunik sivisussuseqartoq, sapaammi marsip 14-iani qaangiummat.
Avannaata Kommunia Avatangiisinut Naalakkersuisoqarfimmut immikkut akuersissummik nutaamik qinnuteqarsimavoq, kisianni qinersinissaq kommuni ammaannartumik ikuallaasarnerata ingerlateqqinneqarsinnaaneranut akornusiivoq.
Avatangiisinut Naalakkersuisoqarfik Sermitsiaq.AG-mut paasissutissiivoq, kommunimit immikkut akuersissuteqarfigineqarnissamik qinnuteqaat suliarineqarsinnaanngitsoq, immikkut akuersissuteqarnissaq politikkikkut aalajangiivigineqartussammat, taamaalillunilu qinersisoqarnerata nalaani suliarineqarsinnaanan.
Sapaatip-akunnerini arlalinni utaqqisariaqartut
- Tassa utaqqiisaasumik immikkut akuersissummik nutaamik tunniussisoqarsimanngilaq, Avatangiisinut Naalakkersuisoqarfimmi immikkoortortamut pisortaq, Karen Anne Arleth, paasissutissiivoq.
Taamaalilluni nunaqarfinni ammaannartumik ikuallaasarnerup akerleriissutaasup ingerlateqqinneqarsinnaalernissaanut sapaatip-akunneri arlallit ingerlasinnaapput.
Ussassaarut
Apriilip 6-ani qinersineq naammassineqaqqaartussaavoq, kisianni tamatuma kingorna ikuallaasarneq ajornartorsiutaasoq, dioxinik kræfteqalissutaasinnaasunik pilersitsisinnaasoq, akuerineqassanersoq politikerinit isummerfigineqarsinnaanngortinnagu naalakkersuisoqatigiinnik pilersitsiniarluni isumaqatigiinniarnerit naammassineqaqqaartussaapput Naalakkersuisunillu nutaanik pilersitsisoqaqqaartussaalluni.