Nunarput geologimik ilinniarsimasumik nutaamik peqalerpoq

Jane Lund Plesner ataasinngormat 14. juni kandidatitut specialiliani illersoramiuk 12-imik karakterilerneqarpoq. Taamaasilluni Københavns Universitetiani ujarassiuutut kandidatitut ilinniakkaminik naammassinnilluni karakterii agguaqatigiissillugit 11,11-uvoq.

Jane Lund Plesner nunatsinni peroriartorami qaqqarsuarnik kusaginnittuaannarsimavoq.

- Nunatsinni peroriartorpunga, pinngortitarlu kusanarluinnartoq avatangiiseriuarsimallugu. Paaserusuttuaannarsimavara qaqqarsuit qanoq pinngorsimanersut. Ilisimatusarlunilu ilinniarneq paasisaqarnissannut tulluarluinnarsimavoq, tassami apeqqutigisinnaasakka taamaasillunga akissutigisinnaalissagakkit, Jane Lund Plesner Sermitsiaq.AG-mut oqarpoq.

Kandidatitut specialeliorami Nuup Kangerluani Isuata eqqaani qaqqarsuit 3,8 milliardit matuma siorna pinngorsimasut pillugit ilisimatusarluni allaatigisaqarpoq.

Sulilluarneq akilertarpoq

Jane Lund Plesner maanna Nuummiilereerpoq ilinniakkanilu atorlugu sulisussanngorluni. Aatsitassat pillugit ujarassiuutut periarfissaqalerpoq nuna tamakkerlugu sumiiffiit assigiinngitsut tikittalernissaannut.

Jane Lund Plesnerip isertuutinngilaa ilinniakkamik aallartitsineq naammassinninnissarlu oqitsuinnaasanngitsoq.

- Ilinniakkamik taassuminnga naammassinninnissaq imaannaanngitsuuvoq, imminulli akilersinnaalluarluni. Oqaatsit "sulerulunneq imminut akilertarpoq” ilinniarninni atuulluinnarpoq, oqarpoq.

Eqqaamasat nuannersut

Ilinniarnerminiilli nuannersorpassuarnik aamma eqqaamasaqarpoq. Ukiuni tallimani ilinniartuunermini paasisassarsiorluni angalasarnernut arlalinnut ilaasarsimavoq, soorlu Spaniamut, Cybernimut aamma Norgemut.

- Angalanitsinni teoritut ilikkarsimasagut qanoq atorsinnaanerlugit ilikkarpagut. Sumiiffinni misissuiartornerni nunap ilusaata qanoq ittuussusaanik uuttuineq naatsorsuinerlu aamma ilikkarpagut, Jane Lund Plesner oqaluttuarpoq.