illersornissaq
Nunarput namminersortoq Nato-mi ilaasortaaginnassaaq
Nunarput namminersulerpat illersornissamut aningaaasartuutit amerlagaatsiarsinnaapput. Inatsisartut siunissami illersornissaq sillimaniarnerlu pillugiit politikkiat ullormi oqallissaarinermi apeqquteqaataasoq takuneqarsinnaavoq.
Ane Hansen (IA) nammineq ilisimaarippaa ullormi apeqquteqaatini immikkuullarissuusut. Illersornissaq, sakkutuujusussaaneq Nato-lu pillugit politikerit kalaallit nalinginnaasumik oqallisiginissaat piffissaajaatigineq ajorpaat.
Naalagaaffiit pissaanilissuit akornanni
Kisianni tassa namminilivinnissaq toraarlugu ingerlalernermi apeqqutinngorpoq qanoq nunat pissaanilissuit allat igalassimaarnissaat pillugit apeqqut qanoq paaminnartigisoq.
- Eqqaamasariaqarparput nunarput nunat pissaanilissuit USA Ruslandillu akornanni inissisimanera, Ane Hansen (IA) oqalugiaammini taama oqarpoq.
Nordvest-passage avannaata kitaani aqqutissiaq aqqutigineqarlualerneranit taamaalillunilu angallaffigineqarlualernissaanit ilimanarnera naapertorlugu nakkutilliineq namminersortuunerullu atortinnissaata pisariaqartinnera annertusiinnassaaq.
Amerlasuunik taperserneqarpoq
Tassunga atatillugu aamma isumaqarpoq Nunarput namminersortoq ilumut Nato-mi ilaasortaaginnassanersoq oqallisiginissaa pingaaruteqartoq.
Oqalugiartut akornanni ilaasortaaginnarnissaq tapersersorneqagaatsiarpoq.
- Mianersuaattumik qanorluunniit iliuuseqartoqalissagaluarpat Siumumut pingaaruteqarluinnarpoq Nato-mi ilaasortaanerput apeqquserneqartariaqanngitsoq , soorlu Siumut oqaaseqartartuat, Jens Erik Kierkegaard oqartoq.
Amerlanerit iluseq takorloorpaat Islanditut ittoq, nuna nammineq illersornissamut politikkeqangikkaluarluni illersornissaqatigiinnut ilaasortaaginnartoq.
Akia: 300 millonit 600 millionillu akornini
Kisianni Nato-mi ilaasortaaneq akisoqaaq. Piumasaqaataavoq nunat BNP-nnit 2 procentia illersornissamut atorneqassasut. Taamaalilluni Nuanarput ukiumut 300 millioninit akiliisassaaq.
Soorunalimi nunat amerlasuut soorlu Danmark ikinnerusunik akiliisarpoq. Kisiannili tassa nunatsinni akiligassaq qaffasinnerujussuusinnaavoq.
Maannakkorpiaq Nunatta illersornissaanut Danmark 600 millionit kruunit pallillugit akiliisarpoq. Taamaattumik nunatta akisussaaffiit tamakkerlugit tiguniarunigit, ullumikkut Arktisk Kommando-mit akisussaaffigineqartut akiligassaq taama isikkoqalersinnaavoq.
Illersornissamut akisussaaffiit makkuupput annaassiniarnernut kiffartuussineq, aalisarnermik nakkutilliineq soorlu aamma namminersortuunissamut atuutitsineq immakkut silaannakkut nunamilu. Nunami nakkutilliineq ilaatigut Sirius-patrulje pineqarpoq.