Nunarput pillugu oqaaseqartartoq aalakoorluni biilertoq
Konservativet silap pissusianut nunatsinnullu tunngasunut oqaaseqartartuat Per Ørum Jørgensen arfininngormat ullaakkut politiinit unitsinneqarpoq aalakoorluni biilertoq.
Konservativet sinnerlugit Folketingimut ilaasortaq Per Ørum Jørgensen arfininngormat ullaannguaq politiinit unitsiinneqarpoq.
Aava imigassartaqarnersoq uuttorneqarmat paasineqarpoq aava imigassamik akoqarpallaartoq.
Oqaaseqartartup pisimasoq ajuusaarutigaa kinguneqaatissaalu atorlugit.
- Piffissami kingullermi inuttut ajornartorsiuteqarsimavunga iluamik iliuuseqarfigisimanngisannik, tusagassiorfinnut nalunaarummini allappoq.
39-nik ukiulik Per Ørum Jørgensen maanna sulinngiffeqarallassaaq, sapatillu akunnerata tulliani katsorsartissalluni.
Konservativet ilaasortaasa siulittaasuat Henriette Kjær dr.dk-mut oqarpoq:
- Soorunami imigassartorsimalluni biilerneq ilalinngilluinnarpara. Per sianiilliorsimavoq nuannaarutigaaralu maanna ikiortissarsiulermat. Per suleqataalluartuuvoq sapinngisarpullu tamaat tapersersorniassavarput ajornartorsiumminik qaangiiniarnerani.
Per Ørum Jørgensen namminersorneq pillugu isumalioqatigiissitami 2005-imi pilersinneqartumi ilaasortaavoq tamatumalu kingorna partiimini Kalaalit Nunaannut tunngasunut oqaaseqartartuulluni.